Elordada «Sergeı Maslov. Juldyzdy kóshpendi» atty kórme ashyldy
ASTANA. QazAqparat - Búgin Qazaqstan Respýblıkasy Ulttyq mýzeıi Nevzorovtar otbasy atyndaǵy Shyǵys Qazaqstan oblystyq beıneleý óneri mýzeıimen birlesip sýretshi Sergeı Maslovtyń «Sergeı Maslov. Juldyzdy kóshpendi» atty jeke kórmesin ashty.
Kórmege sýretshiniń kórkemsýret, grafıka, mátin, ınstallıatsııa syndy túrli janrlarda oryndalǵan týyndylary qoıyldy. Kórmeniń ashylý saltanatynda Ulttyq mýzeı dırektory Darhan Myńbaı: «Biz dástúrli ónerdi ǵana emes, zamanaýı ónerdiń ártúrli aǵymdaryn da qoldaýymyz kerek. Óıtkeni, óner bir ǵana formada bolady dep eseptesek tuıyqqa tirelemiz. Sondyqtan, biz ónerdiń jańa baǵyttaryn, qazirgi zamanda álem moıyndaǵan janrlardy nasıhattap, sol jumystardy kórsetýge tyrysamyz», - dep, kórmeniń basty maqsatyna toqtalyp ótti.
Sergeı Maslovtyń sýretshi retindegi eńbek joly 1980 jyldardyń sońynda bastaldy. Sol ýaqyttarda Maslov shyǵystyq mıstıtsızm jáne stıldik eklektık baǵytyn damytqan «Túngi tramvaı» kórkemóner tobynyń jetekshisi bolatyn. Keıinnen óziniń basty shyǵarmashylyq qaǵıdasy retinde mıftik shyǵarmashylyqty tańdap alyp, Voıadjer galereıasynyń kórkemóner tobyna qosylǵan.
Maslovtyń eńbekteri QR Ulttyq mýzeıiniń, Á.Qasteev atyndaǵy Óner mýzeıiniń (Almaty), Nevzorovtar otbasy atyndaǵy Shyǵys Qazaqstan oblystyq beıneleý óneri mýzeıiniń (Semeı), MHKA Antverpenniń, Djeın Voorıs Zımmerlı kórkemóner mýzeıiniń (Nıý-Braýnsýık) toptamalarynda, sol sııaqty Qazaqstan men shetelderdegi jeke toptamalarda saqtaýly.
Sergeı Maslovtyń «Daladaǵy aq túnder» týyndysy 2013 jyly Sotheby's aýktsıon úıi Londonda uıymdastyrǵan «Jolaıryq» kórmesine Salıhıtdın Aıtbaevtyń, Bahtııar Tabıevtyń, Rysbek Ahmetovtiń týyndylarymen qatar qoıyldy.
Ulttyq mýzeı osy kórme arqyly elimizde ǵana emes, shetelderde de tanymal, kókeıtesti óner salasynda jumys jasaıtyn az ǵana qazaqstandyq sýretshilerdiń shyǵarmashylyǵyn halyqqa tanytýdy kózdeıdi.
Kórme 31 naýryzǵa deıin jalǵasady.
