Elordada «Sergek» júıesi arqyly karantın kezinde kimderge aıyppul salynýy múmkin
NUR-SULTAN. QazAqparat - Karantın jáne tótenshe jaǵdaı kezinde elordada «Sergek» júıesi kúsheıtilgen rejımde jumys istep jatyr, dep habarlaıdy QazAqparat elorda ákimdigine silteme jasap.
Tekserý júrgizýshilerge qatysty jasalady. «Sergek-patrýl» bazasyna avtokólik toqtaǵan kezde polıtseıler júrgizýshi men kóliktiń derekterin: JSN, kóliktiń memlekettik nómiri jáne júrgizýshiniń naqty turǵylyqty jeri men jumys ornyn engizedi. Negizsiz qalada júrgen. tártip buzýshylar alǵashynda eskertý alady. Ekinshi márte tártip buzǵan jaǵdaıda Nur-sultan qalasynyń mamandandyrylǵan aýdanaralyq ákimshilik sotynyń sheshimine sáıkes 10 AEK aıyppuldan 15 táýlikke deıin ákimshilik qamaýǵa alynýy múmkin.
«Qaıta tekserý kezinde, eger aqparattyq bazanyń málimetterine sáıkes, azyq-túlik pen dári-dármekter alýdan basqa maqsatta, marshrýtty negizsiz buzǵany anyqtalsa, júrgizýshi QR ÁQBK 476-baby («Tótenshe jaǵdaı rejımin buzý») boıynsha ákimshilik jaýapkershilikke tartylady», –delingen habarlamada. Qazirgi ýaqytta bazada TJ kezindegi quqyq buzýshylyqtar eseptelip jatyr. Kún saıyn «jumys – úı» qaǵıdaty boıynsha avtokólik júrgizýshileriniń derekteri engiziledi. TJ rejımi men karantın tártibin buzǵany úshin aıyppuldar búgingi kúni ózekti.
Nur-Sultan qalasynda barlyǵy 13 000 «Sergek» kamerasy bar. Ol kúnine 12 mln-nan astam oqıǵany óńdeýge múmkindik beredi.
