Elordada senim telefonyna habarlasqan 350 áıelge kómek kórsetildi
NUR-SULTAN. QazAqparat – Nur-Sultan qalalyq polıtsııa departamentinde áıelderdi zorlyq-zombylyqtan qorǵaý tobynyń senim telefony bar. Jyl basynan beri osy senim telefonyna habarlasqan 350-den astam áıelge quqyqtyq, psıhologııalyq kómek kórsetildi. Bul týraly Antikor.live jobasynda Nur-Sultan polıtsııa departamenti jergilikti polıtsııa qyzmeti basqarmasy áıelderdi zorlyq-zombylyqtan qorǵaý bólimshesiniń aǵa ınspektory Gúlmıra Shrahmetova aıtty, dep habarlaıdy QazAqparat tilshisi.
«Otbasylyq, turmystyq salada sizge qandaı da bir quqyq buzýshylyq jasalǵan bolsa – birden 102 nómirine habarlasyńyz. Nur-Sultan qalalyq polıtsııa departamentinde áıelderdi zorlyq-zombylyqtan qorǵaý tobynyń senim telefony bar. 71-60-63 nómirine ashyq túrde de, anonım túrde de habarlasa alasyz. Jyl basynan beri osy senim telefonyna habarlasqan 350-den astam áıelge quqyqtyq, psıhologııalyq kómek kórsettik», - deıdi Nur-Sultan polıtsııa departamenti jergilikti polıtsııa qyzmeti basqarmasy áıelderdi zorlyq-zombylyqtan qorǵaý bólimshesiniń aǵa ınspektory Gúlmıra Shrahmetova.
Onyń aıtýynsha, kóp áıel ózine jasalǵan quqyq buzýshylyqqa kónip júre beredi.
«Kóne berýdiń sońy qaıǵyly jaǵdaıǵa alyp kelýi múmkin. Otbasylyq janjal tek áıelge ǵana emes, otbasynyń basqa múshelerine de keri áserin tıgizedi. Anasynyń taıaq jegenin kórý, normatıvti leksıkaǵa jatpaıtyn sózderdi estý balanyń psıhıkasyna keri áser etedi», - deıdi ol.
