Elordada Senat depýtatyn saılaý el zańnamasyna saı ótti - halyqaralyq baıqaýshy

NUR-SULTAN. QazAqparat - Elordada Senat depýtatyn saılaý el zańnamasyna saı ótti. Bul pikirdi Túrkitildes memleketter yntymaqtastyǵy keńesi mıssııasynyń basshysy, Ázerbaıjannyń Qazaqstandaǵy Elshisi Rashad Mammadov aıtty, dep habarlaıdy QazAqparat tilshisi.

«Bul saılaýǵa halyqaralyq baıqaýshy retinde qatysyp otyrmyz. Óte kóp kezdesý ótkizdik. Keshe Qazaqstan Ortalyq saılaý komıssııasynda kezdesý boldy. Nur-Sultan qalasy ákimdiginde de kezdesý ótkizip, QR Parlamenti Senaty depýtattyǵyna kandıdattarmen kelissózder uıymdastyrdyq. Nur-Sultan qalalyq máslıhatynyń depýtattarymen áńgimelestik. Al búgin Nur-Sultan qalalyq saılaý ýchaskesi ashylǵan sátten, saǵat 10-nan beri osy jerde júrmiz», - dedi ol.

Onyń atap ótýinshe, Qazaqstanda da, bizdiń Túrkitildes memleketterde de koronavırýs indetiniń taralýyna baılanysty bul saılaýǵa úlken delegatsııa kele almaǵan. Túrki keńesi osynaý uıymǵa múshe eldermen, quryltaıshylarymen aqyldasa otyryp, Qazaqstandaǵy dıplomatııalyq mıssııalarynyń ókilderinen sheteldik baıqaýshylar jasaqtaý týraly sheshim qabyldaǵan.

«Ázerbaıjan bıyl bul uıymǵa tóraǵalyq etedi. Sondyqtan QR Parlamenti Senaty depýtattaryn saılaýdy baıqaýshylar mıssııasyna Ázerbaıjannyń Qazaqstandaǵy Tótenshe jáne Ókiletti Elshisi retinde men tóraǵalyq qyzmetin atqaramyn. Delegatsııa quramyna Qyrǵyzstan, Ózbekstan, Túrkııa jáne Ázerbaıjan elderi kiredi. Búgin biz kandıdattardy, baıqaýshylardy, BAQ ókilderin tirkeý sátinen bastap monıtorıng júrgizdik. Máslıhattyń Nur-Sultan qalalyq saılaý komıssııamen birlesken otyrysyna qatystyq. Daýys berý protsesine baqylaý jasadyq, ol óte jaqsy, ashyq ótti. Tańdaýshylardyń barlyǵyna qolaıly jaǵdaı jasalǵan. Ókinishke oraı delegatsııamyz óte shaǵyn bolǵandyqtan Nur-Sultan qalasynan basqa óńirlerge bara almadyq. Degenmen, saılaýdyń demokratııalyq jaǵdaıda, Qazaqstan zańnamasyna saı ótti dep aıtýǵa bolady», - dedi Rashad Mammadov.