Elordada sebepsiz júrgen 400-ge jýyq avtokólik aıyppul turaǵyna qoıyldy
NUR-SULTAN. QazAqparat – Elordada qosymsha 4 aıyppul turaǵy ashyldy, dep habarlaıdy QazAqparat.
«Qalada sebepsiz júrgeni úshin 370-ten astam avtokólik aıyppul turaǵyna jetkizildi. Qalada qosymsha 4 aıyppul turaǵy ashyldy. Karantın rejımi sáýir aıynyń sońyna deıin uzartylǵanyn este saqtaǵan jón. Qala turǵyndary karantınniń barlyq erejelerin saqtaýǵa mindetti. Tártipbuzýshylar qatań jaýapkershilikke tartylady. Polıtsııa qyzmetkerleri baqylaýdy kúsheıtti. Olar táýlik boıy qalada kezekshilik jumystaryn atqaryp jatyr. Mobıldi toptar, jaıaý narıadtar jumyldyryldy. Ótkizý-baqylaý beketterindegi jaǵdaıdy dron arqyly qadaǵalap jatyr», - dep atap ótilgen taratylǵan málimette.
Belgili bolǵandaı, 6-12 sáýir aralyǵynda 800-den astam azamat ákimshilik jaýapkershilikke tartyldy. Olardyń 32-i qamaýǵa alynsa, 538-ine aıyppul salyndy. 174-i eskertý aldy, al 60 is sotta qaralyp jatyr.
«Karantın rejımin saqtaý qajettigi týraly birneshe ret eskertilgenine qaramastan, keıbir adamdar bul talapty elemeı jatyr. Osyǵan oraı baqylaý kúsheıtildi. Tártipbuzýshylardy jazalaıtyn bolamyz. Avtokólikterdi aıyppul turaǵyna, al isti sotqa jiberemiz. Keıbir adamdardyń salǵyrttyǵynan halyq zardap shegýge mindetti emes. Koronavırýsty juqtyrý qaýpi joıylǵan joq. Qala turǵyndaryn qabyldanǵan sharalarǵa túsinistikpen qarap, ózderiniń jáne bizdiń ýaqytymyzdy zaıa ketirmeýge shaqyramyz. Atqarylyp jatqan jumystyń barlyǵy sizdiń jáne jaqyndaryńyzdyń qaýipsizdigi úshin jasalýda», - dep atap ótti polıtsııa ókilderi.
Esterińizge sala keteıik, turǵyndarǵa jaqyn mańdaǵy azyq-túlik dúkenine, dárihanaǵa, medıtsınalyq qyzmet alý úshin jáne jumysqa barý úshin ǵana úıden shyǵýǵa ruqsat etiledi.
