Elordada saıabaqtar ashylyp, qydyrýǵa ruqsat berildi

NUR-SULTAN. QazAqparat – Karantın kúshinde qalǵan elordada turǵyndar saıabaqqa shyǵyp, qydyryp, serýendeı ala ma? Bul suraqqa Nur-Sultan qalasy ákiminiń orynbasary Baqtııar Máken jaýap berdi, dep habarlaıdy QazAqparat tilshisi.

«QR Prezıdentiniń tótenshe jaǵdaı rejımin qamtamasyz etý jónindegi memlekettik komıssııanyń 20 sáýirinde ótken tapsyrmasyn júzege asyrý aıasynda 250 myńǵa jýyq adam jumysyn qaıta bastap ketti. Memlekettik bas sanıtarlyq dárigerdiń qaýlysyna sáıkes azamattar turǵan jerinne mindetti túrde maska taǵyp, áleýmettik qashyqtyqty saqtaı otyryp, syrtqa shyǵa alady», - dedi Baqtııar Máken OKQ-da ótken baspasóz máslıhatynda.

Qala ákiminiń orynbasarynyń aıtýynsha qazirgi tańda shahardaǵy saıabaqtardyń bári de ashyq.

«Parkterge, aýmaqtarǵa, baqtarǵa barýǵa bolady. Ózen jaǵasymen de qydyrýǵa ruqsat. Biraq úsh adamnan artyq júrmeý kerek. Maska taǵyp, áleýmettik qashyqtyqty saqtaǵan abzal. Sanıtarlyq normalardy saqtaı otyryp, saıabaqta qydyrýǵa bolady», - dedi Baqtııar Máken.