Elordada saýda oıyn-saýyq ortalyǵyna qaraqshylyq shabýyl jasaldy
ASTANA. QazAqparat - Elordalyq polıtsııa qyzmetkerleri saýda, oıyn-saýyq ortalyǵyna jasalǵan qaraqshylyq shabýyldy anyqtady, dep habarlaıdy QazAqparat Elorda Info portalyna silteme jasap.
«Polıtsııaǵa saýda, oıyn-saýyq ortalyǵynyń syrtqy terrıtorııasynyń qaýipsizdigin qamtamasyz etetin jekemenshik kúzet fırmasynyń qyzmetkeri habarlasty. Saǵat shamamen 01:30 kezinde belgisiz bireýler ony kúshtep skotchpen baılap, saýda ortalyǵyna kirmekshi bolǵanyn aıtty. Sondaı-aq, qaskúnemder onyń radıostantsııasyn urlap ketken», - delingen Astana qalalyq ІІD-niń baspasóz qyzmeti taratqan habarlamada.
Elordalyq ІІD-niń krımınaldyq polıtsııa qyzmetkerleri jedel izdestirý sharalary kezinde «Sergek» baqylaý kamerasynyń kómegimen atalǵan qaraqshylyq shabýyldy uıymdastyrǵan azamattardy ustap, ýaqytsha ustaý oqshaýlaǵyshyna jetkizdi.
Olar Jambyl oblysynyń 21-23 jastaǵy úsh azamaty bolyp shyqty. Tergeý barysynda saýda ortalyǵynyń býtıkterin tonamaq bolǵandaryn moıyndady. Atalǵan faktige qatysty QR QK-iniń 192-baby («qaraqshylyq») boıynsha sotqa deıingi tergeý júrgizilip jatyr. Polıtsııa qyzmetkerleri ustalǵandardyń elorda aýmaǵynda basqa da qylmystyq isterge qatysy bar-joǵyn anyqtaýǵa kiristi.
