Elordada saýda ortalyqtary senbi kúni jumys isteıdi

NUR-SULTAN. QazAqparat - Nur-Sultan qalasynyń Bas memlekettik sanıtarlyq dárigeri Janna Pralıevanyń jańa qaýlysyna sáıkes, elordada saýda oıyn-saýyq ortalyqtaryna senbi kúni keshki saǵat 20:00-ge deıin jumys isteýge ruqsat beriledi, dep habarlaıdy QazAqparat tilshisi.

«Saýda oıyn-saýyq ortalyqtarynyń, saýda úıleriniń, saýda ortalyqtarynyń jumysyn kúsheıtilgen sanıtarııalyq-epıdemııaǵa qarsy, sanıtarııalyq-profılaktıkalyq is-sharalardy saqtaı otyryp, bir kelýshige 4 sharshymetr esebinen toltyrylýyn 30 paıyzdan aspaıtyndaı etýmen, rekreatsııa aımaqtarynda jáne demalys araldarynda satyp alýshylardyń bolýyna tyıym salýmen, jumys kestesi jumys kúnderi saǵat 10:00-den 23:00-ge deıin jáne senbi kúnderi saǵat 10:00-den 20:00-ge deıin belgilenip, jeksenbi jáne mereke kúnderi jumystaryna (olarda ornalasqan dárihanalar men tamaq ónimderin satatyn shaǵyn marketterdi, sýpermarketterdi jáne gıpermarketterdi qospaǵanda) tyıym salýmen uıymdastyrylady», - delingen qaýlyda.

Bul rette kórsetilgen obektilerde jáne olardyń aýmaqtarynda ornalasqan attraktsıondardyń, balalardyń oıyn alańdarynyń, oıyn ortalyqtarynyń, kınoteatrlardyń, fýdkorttardyń jumysyna qatań tyıym salynady.