Elordada satyp alý quqyǵynsyz jalǵa beriletin baspanaǵa qujattar qabyldanady

ASTANA. QazAqparat – Astanada kópbalaly otbasylar jáne halyqtyń áleýmettik osal toptary sanattary úshin «Satyp alý quqyǵynsyz jalǵa beriletin turǵyn úı» baǵdarlamasy boıynsha qujattar qabyldana bastaıdy. QazAqparat bul týraly Turǵyn úı ortalyǵyna silteme jasap habarlaıdy.

Baǵdarlamaǵa Astana qalasynyń kommýnaldyq turǵyn úı qorynan baspana kezeginde turǵan kelesi sanattaǵy azamattar qatysa alady:

1) Ekinshi dúnıejúzilik soǵys (EDS) ardagerleri;

1-1) jeńildikteri boıynsha EDS ardagerlerine teńestirilgen ardagerler;

1-2) basqa memleketterdiń aýmaǵyndaǵy urys qımyldarynyń ardagerleri;

2) birinshi jáne ekinshi toptaǵy múgedektigi bar adamdar;

3) múgedek balalary bar nemese olardy tárbıelep otyrǵan otbasylar;

4) keıbir sozylmaly aýrýlardyń aýyr túrlerimen aýyratyn adamdar;

5) jasy boıynsha zeınetkerler;

6) jetim balalar jáne ata-anasynyń qamqorlyǵynsyz qalǵan balalar;

7) qandastar;

8) ekologııalyq zilzalalar, tabıǵı jáne tehnogendik sıpattaǵy tótenshe jaǵdaılar saldarynan turǵyn úıinen aıyrylǵan adamdar;

9) kópbalaly otbasylar;

10) memlekettik nemese qoǵamdyq mindetterdi, áskerı qyzmetti atqarý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyqtyq tártipti qorǵaý kezinde qaza tapqan (qaıtys bolǵan) adamdardyń otbasylary;

11) tolyq emes otbasylar.

Páterlerdiń jalpy sany:

- «Kópbalaly otbasylar» sanaty úshin – 86 páter (tek 2 bólmeli páter);

- basqa sanattaǵy «Halyqtyń áleýmettik osal toptary» úshin – 24 páter:

2 bólmeli – 3 páter;

3 bólmeli – 21 páter.

Turǵyn úıler satyp alý quqyǵynsyz jalǵa beriledi.

Nysandardyń ornalasqan jeri (Astana qalasy):

- «Kópbalaly otbasylar» sanaty úshin:

1. N.Tilendıev dańǵyly, 44a, 44, 44/2 úı;

2. Sh. Qosshyǵululy kóshesi, d. 6,

3. E-767 kóshesi, 11 úı,

4. E-509 kóshesi, 7 úı.

- «Halyqtyń áleýmettik osal toptary» úshin:

1. Tilendıev dańǵyly, 44, 44/2 úı.

Qujattar 2023 jylǵy 17 shildeden bastap saǵat 09: 00-den 2023 jylǵy 26 shilde saǵat 23:59-ǵa deıin qabyldanady.

Qabyldaý tek qatysu.zhilfond.kz portaly arqyly elektrondy túrde júrgiziledi.

Aıta keteıik, qujattardy kezekte turǵan kez kelgen azamat tapsyra alady. Alaıda qatysýǵa ótinim bergender arasynda basqalardan buryn kezekte turǵandar ótedi.