Elordada satylymdaǵy kondıter ónimderinen ishek taıaqshasy tabyldy
NUR-SULTAN. QazAqparat - Nur-Sultan qalasy qoǵamdyq densaýlyq saqtaý departamentiniń basshysy Sádýaqas Baıǵabylov Nursultanda adam densaýlyǵyna qaýipti ónimder satylyp jatqanyn eskertti, dep habarlaıdy QazAqparat vedomstvoǵa silteme jasap.
Bıyl naýryz aıynda ónimderdiń qaýipsizdigine júrgizilgen monıtorıng kezinde «Astana nan tort» JShS shyǵaratyn «Vkýsnıashka» (ıogýrtty, súzbeli, korol torttary) kondıterlik óniminen ishek taıaqshalary shyqqan.
Sondaı-aq «Bespalınova Z.R.» JK-nyń «Mars» dúkeninde ishek taıaqshasy toly, markasy joq «Teńiz qyryqqabat salaty», «Sańyraýqulaq salaty» sııaqty ónimder satylǵany anyqtaldy. Olardyń qaıda óndirilgeni belgisiz. Bulardan bólek, mekenjaıy kórsetilmegen «Respest inc» JShS óndirgen «Aşy frantsýz hot-dogy», «Kónjitti, shujyqty frantsýz sendvıchi» de bar.
«Aıta keteıik, «Respest inc» JShS-niń qaýipti sendvıchteri 2018 jyly da satylǵan. Biraq BAQ pen áleýmettik jeliniń belsendiliginiń arqasynda azamattar ýlanýdan saqtanǵan bolatyn. Onyń mekenjaıy kórsetilmegendikten, departament týra byltyrǵydaı bıyl da tekseris júrgize almaı otyr», - deıdi vedomstvodaǵylar.
Densaýlyqqa qaýipti ónimder arasynda Qytaıdan kelgen «Monster Elves» qýyrshaǵy», «Lol Surprise» qýyrshaǵy», «Lol Surprise», «BOY SERIES» sııaqty oıynshyqtar da bar. Astanalyq bazardaǵy «Muqashev A.D.» JK №053 dúkeninen tabylǵan osy oıynshyqtardyń quramynda formaldegıd bary anyqtaldy.
Oıynshyqtardyń markasynda ımporttaýshy derekteri de, shyǵarylǵan ýaqyty da, naryqtaǵy belgisi de, jaramdylyq merzimi de kórsetilmegen, tipti memlekettik tilge aýdarmasy da joq.
«Qazirgi kezde anyqtalǵan qaýipti zattar tekserilip, ákimshilik sharalaryn qoldaný máselesi qaralýda. Departament «Zolotoı klıýchık», «Aqbota», «MARWIN» sııaqty basqa da arnaýly dúkenderdegi osyndaı oıynshyqtardy tekseredi. Onyń nátıjeleri týraly keıinirek habarlanady», - deıdi departament ókilderi.
Departament elorda dúkenderinen qaýipti zattar anyqtalǵanda, azamattardan myna nómirlerge habar berýin suraıdy: 8 (7172) 31-61-81, 8 778 012 70 00.
