Elordada sanıtarlyq normalardy saqtamaǵan 120 nysan jabyldy
NUR-SULTAN. QazAqparat – Nur-Sultanda kelýshilerge kalıan usynǵan bar jabyldy. Bul týraly QazAqparat ákimdiktiń instagram paraqshasyna silteme jasap habarlaıdy.
«Ákimdiktiń mobıldi toby polıtseıler jáne epıdemıologtarmen birge kún saıyn sanıtarlyq normalardy buzǵan mekemelerdi anyqtaý úshin reıd júrgizedi. 2 maýsymda monıtorıngpen 50-den astam nysan qamtyldy. Onyń ishinde kólik jýý, dúkender, dámhanalar, barlar jáne t.b. bar.
Sanıtarlyq normalardy saqtamaǵan 4 nysan jabyldy. Máselen, «Mıata» laýndj-barynda (Qabanbaı batyr dańǵyly) kelýshilerine kalıan usynylǵany anyqtalyp, mekeme jabyldy.
Atalǵan nysandar sanıtarlyq-epıdemıologııalyq normalardyń qatań saqtalýyn qamatamasyz etpeıinshe jabyq bolady. Mundaı qatań shara koronavırýstyń taralýyna jol bermeý úshin qabyldandy.
Buǵan deıin Nur-Sultanda sanıtarlyq normalardy saqtamaǵan 120 nysan jabyldy, onyń ishinde qurylys kompanııalary da bar. 150 nysan eskertý alyp, birqataryna aıyppul salyndy.
Elordada maska taǵý rejımi áli de saqtalýda. Avtobýstar, dúkender jáne basqa da adam kóp jınalatyn jabyq jerlerde maska kıip, araqashyqtyq saqtap, antıseptıkti paıdalaný qajet. Turǵyndar sanıtarlyq-epıdemıologııalyq normalardy saqtamasa, qalada kúsheıtilgen karantın rejımin engizýge týra keledi.
