Elordada sándik-qoldanbaly óner sheberi Gúldana Jurqabaevanyń jeke kórmesi ótedi
ASTANA. QazAqparat - 2017 jyldyń 25 qańtarynda Qazaqstan Respýblıkasynyń Tuńǵysh Prezıdenti - Elbasy kitaphanasynyń Mýzeıi ǵımaratynda sándik-qoldanbaly óner sheberi Gúldana Jurqabaevanyń «Ózińe jol tabý» atty jeke kórmesi ashylady, dep habarlaıdy Mádenıet jáne sport mınıstrliginiń baspasóz qyzmeti.
Kórme «Úkili úmit» jastar shyǵarmashylyǵyn qoldaý boıynsha kórme jobasynyń sheńberinde uıymdastyrylyp otyr.
2009 jyly QR Tuńǵysh Prezıdenti Mýzeıiniń «Alǵa umtylǵan Qazaqstan» atty aımaqtyq kórme jobasynyń sheńberinde Qostanaı oblysynyń mýzeıleri qorynan «Ulttyq mádenıet besigi» atty kórme uıymdastyrylǵan edi. Onda Qostanaı oblysynyń músinshileri, sýretshileri men sándik-qoldanbaly óner sheberleri óz jumystaryn usyndy, olardyń qatarynda Gúldana Jurqabaeva da boldy. Gúldananyń jumystary tartymdylyǵymen erekshelenip, jurtshylyqtyń nazaryn aýdardy. Sodan beri sýretshiniń 150-ge jýyq shyǵarmashylyq týyndysy dúnıege kelip, alys-jaqyn shet memleketterge tanymal bola bastady.
Gúldana Jurqabaeva 1979 jyly 25 qańtarda Qostanaı oblysynyń Jangeldi aýylynda dúnıege kelgen. Torǵaı gýmanıtarlyq kolledjin aıaqtap, sodan soń 2003 jyly Qostanaı gýmanıtarlyq ınstıtýtyn «dızaıner» mamandyǵy boıynsha támamdaǵan. Gúldana Astana qalasynyń Sýretshiler odaǵynyń múshesi, Qostanaı metsenattary klýbynyń «Shabyt» syılyǵynyń laýreaty. G. Jurqabaevanyń jumystary kóptegen respýblıkalyq jáne sheteldik kórmelerge qatysty. 2016 jyldyń 16 jeltoqsanynda sýretshi San-Marıno Respýblıkasynda ótken Halyqaralyq óner konkýrs-festıvalinde birinshi oryndy ıelendi.
«Ózińe jol tabý» kórmesinde sýretshiniń bylǵary mataǵa akrıl boıaýlarymen beınelengen 40-tan asa jumystary usynylady.
