Elordada «Sálem Astana» merekelik kontserti ótedi
ASTANA. QazAqparat - 4 shilde kúni Astana qalasynyń Ortalyq alańynda Astana kúnine arnalǵan «Sálem Astana» atty merekelik is-shara ótkiziledi.
Bul týraly Astana qalasy ákiminiń baspasóz qyzmeti habarlady.
Qala kúni merekesine Astana qalasynyń Bilim basqarmasy, qosymsha bilim berý mekemeleriniń oqýshylary: jas mýzykanttar, bıshiler, ánshiler, sýretshiler, qoldanbaly óner sheberleri óz úlesterin qosady. Olar - elordanyń 500-den astam jas mýzykanttary jáne sýretshileri.
Kontserttik baǵdarlamada qazaq halyq aspaptarynyń birikken orkestri Astananyń 17 jyldyǵyna arnap 17 kúı oryndaıdy, kóne qazaq aspaptarynyń súıemeldeýimen folklorlyq jáne bı ujymdary qatysady. Qazaqstannyń basqa qalalarynyń tvorchestvolyq ujymdarynyń quttyqtaýlary, qoldanbaly óner sheberleri men jas sýretshiler kórmesi usynylady.
Mádenı is-shara Astana qalasy ákimdiginiń, qalalyq Bilim basqarmasynyń jáne №1 balalar mýzyka mektebiniń qoldaýymen uıymdastyrylýda.
