Elordada salaýatty ómir saltyn nasıhattaǵan aktsııa uıymdastyryldy
ASTANA. KAZINFORM – Búgin elordada «Zań jáne tártip» baǵdarlamasy aıasynda «Táýeldilikti sportqa aıyrbasta» atty sporttyq aktsııa ótti. Bul baǵdarlama turǵyndar arasyndaǵy veıpke táýeldilik deńgeıin tómendetýge baǵyttalǵan. Aktsııanyń basty maqsaty – temeki ónimderin sporttyq qural-jabdyqtarǵa aıyrbastaý arqyly salaýatty ómir saltyn nasıhattaý.
Atalǵan is-sharaǵa dzıýdodan Qazaqstannyń sport sheberi Sergeı Pak – Ortus.kz dzıýdo mektebiniń negizin qalaýshy ári bas jattyqtyrýshysy qatysty. Onyń aıtýynsha, aktsııa jas urpaqty salaýatty ómir saltyna tartýǵa jáne zııandy ádetterden bas tartýǵa baǵyttalǵan. Qatysýshylar kóshedegi turǵyndarǵa jaqyndap, temeki ónimderin sporttyq ınventarǵa aıyrbastaýdy usynyp, zııandy ádetterdiń ornyna densaýlyqqa paıdaly balama bar ekenin eske salady.
– Búgingi aktsııa bizdiń jas urpaqty tartýǵa baǵyttalǵan. Biz zııandy ádetterdi joıýǵa tyrysamyz. Qolymyzdan kelgenniń bárin barynsha jasaýǵa tyrysamyz. Mundaı aktsııalar aı saıyn ótkiziledi dep aıta alamyn. Qarjylandyrýdy Sport basqarmasy júzege asyrady, – dedi Sergeı Pak.
Sonymen qatar ol atalǵan is-sharanyń tıimdiligi adamnyń zııandy ádetterden bas tartýǵa degen jeke nıetine baılanysty ekenin atap ótti. Aktsııa motıvatsııalyq ári eske salý qyzmetin atqarady. Qoǵamdaǵy kózqaras ártúrli bolǵanymen, kópshilik – shamamen 80 paıyzy aıyrbastaýǵa kelisip, bastamany oń qabyldaıdy jáne ony ózderi úshin jańa tájirıbe retinde kóredi.
– Bári adamnyń ózine baılanysty. Eger adam shynymen zııandy ádetterden bas tartqysy kelse, mundaı aktsııalar olardy tek yntalandyrady. Keıde adamǵa eske salý qajet, búgingi aktsııa arqyly biz salaýatty ómir salty bar ekenin, basqa jol da bar ekenin eske salǵymyz keledi, – dedi Sergeı Pak.
Sondaı-aq sport sheberi árbir bala úshin sportpen aınalysýdyń mańyzdylyǵyn atap ótti. Onyń aıtýynsha, mindetti túrde dzıýdomen aınalysý shart emes, kez kelgen sport túri adamnyń boıyndaǵy mańyzdy qasıetterdi damytady.
– Sport eńbekqorlyq pen jaýapkershilik sııaqty qasıetterdi qalyptastyrady. Bul qasıetter bolashaqta myqty negiz jáne ishki tirek bolyp, eresek ómirde kómektesedi. Jastar arasynda sportty nasıhattaý jáne keńinen taratý asa mańyzdy, – dedi ol.
Sonymen qatar Saryarqa aýdany ákimi apparatynyń bólim basshysy Damır Hısmatýllınniń aıtýynsha, aktsııa «Zań jáne tártip» narratıviniń bir bóligi retinde bir jyldan astam ýaqyt ishinde «Saryarqa» aýdanynda 100-den astam is-shara uıymdastyrylyp, oǵan qoǵam, tanymal blogerler men sportshylar qoldaý kórsetip jatyr. Uıymdastyrýshylar barsha turǵyndardy aktsııaǵa qatysýǵa jáne áleýmettik jelilerde qoldaýǵa shaqyrady.
– Qalanyń mádenıet jáne sport basqarmasy tarapynan salaýatty ómir saltyna arnalǵan, osy qaǵıdany elordamyzdyń jastary men jas urpaǵy arasynda engizýge baǵyttalǵan is-sharalar ótkiziledi, – dedi ol.
Budan bólek, spıker «Stop vandal» aktsııasy da osy narratıv aıasynda turaqty túrde uıymdastyrylatynyn atap ótti. Bul bastama kommýnaldyq múlikti búldirýge qatysy bar tulǵalardy anyqtaýǵa baǵyttalǵan jáne ishki ister organdary qyzmetkerlerimen birlesip júzege asyrylady. Sońǵy bir jylda 30-dan astam adam Ákimshilik quqyq buzýshylyq týraly kodeks boıynsha jaýapkershilikke tartylǵan. Jalpy óndirilgen aıyppul somasy 1,5 mln teńgeden asqan.
Aıta keteıik, Ázerbaıjanda elektrondy temekini paıdalaný, ımporttaý, eksporttaý, óndirý, kóterme jáne bólshek saýdada satý, sondaı-aq ótkizý maqsatynda saqtaý úshin aıyppul belgilenedi.
Sonymen qatar Petropavlda boıjetken bir tal temeki shegip, jansaqtaý bólimine tústi.
Elektrondy temeki qoldaný mıokard ınfarkti men ınsýlt qaýpin arttyrýy múmkin. Mundaı qorytyndyǵa ǵalymdar júrgizgen zertteý nátıjesinde keldi.
