Elordada «Sáken Narynovtyń sáýlet syıqyry» atty kórme ashyldy
STANA. Mamyrdyń 24-i. QazAqparat /Marlan Jıembaı/ - Búgin elordadaǵy «Kórme» kesheninde sáýletshi S.Narynovtyń «Sáken Narynovtyń sáýlet syıqyry» atty kórmesiniń ashylý rásimi ótti.
«Sáken Narynovtyń esimi sáýletkerlerdiń arasynda tanymal. Óıtkeni, jas kezinen túrli jobalarǵa qatysyp, óziniń shyǵarmalarynyń ereksheligimen kózge tústi. Onyń keıbir shyǵarmalaryn birden túsiný de qıyn. Alaıda durystap, baıyppen qarap, túsinik alyp, basqa kózben qaraǵanda ǵana týyndylarynyń ishki dúnıesi ashyla, tanyla bastaıdy. Eńbekteriniń fılosofııalyq, kórkemdik mańyzyn, onyń oı-pikirin tanyp, bilýge bolady. Sáýletshiniń ereksheligi ómirde bizdi qorshap jatqan neshe túrli kókeıge tanymal zattardy, ǵımarattardy, úılerdi san qıly sharshy, shar, tor syndy formalarmen erekshe kompozıtsııa, ǵımarat ne bolmasa músin retinde shyǵarady. Sáýletshiniń qaı týyndysyn alyp qarasań da qaıtalanbaıtyn, tereń oı salatyn óte qyzyqtyratyn, kóz tartatyn jumystar», deıdi QR eńbek sińirgen sáýletshisi Serik Rústembekov.
Kórmeden S.Narynovtyń sáýlet nysandarymen qatar Astananyń ortalyq bóliginiń, onyń ınfraqurylymdyq damý perspektıvasynyń, qala aýdandaryndaǵy joldardyń, alańdar men sýburqaqtary jobasynyń, jubaılardyń sımvolıkalyq aımaǵy ornalasqan saıabaqty ornalastyrýdyń sheshimdi túrleri men joldaryn kórýge bolady. Sondaı-aq sáýletshiniń elimizde jáne shetelderde ótken túrli baıqaýlarǵa usynǵan Mysyrdyń Ǵızasyndaǵy murajaıynyń, Norvegııadaǵy tsýnamı qurbandary eskertkishiniń, Astanadaǵy Beıbitshilik pen kelisim saraıy men Halyqtar dostyǵy eskertkishiniń jobalarynyń syzbasy men maketin de tamashalaýǵa múmkindik bar.
S.Narynov otandyq jáne sheteldik basylymdarda jaryq kórgen 34 ǵylymı maqalanyń, 5 ónertabystyń, 100-den astam sáýlet jobalarynyń avtory.
