Elordada sadaq atýdan halyqaralyq týrnır bastaldy
ASTANA. QazAqparat - Astana qalasynda sadaq atýdan «Grand Prix Astana» II halyqaralyq týrnır bastaldy, dep habarlaıdy QazAqparat elorda ákimdiginiń resmı saıtyna silteme jasap.
Jarys Qazaqstan jeńil atletıka kesheninde ótip jatyr.
«Bıylǵy dodaǵa Qazaqstannan ózge Túrikmenstan, Ózbekstan, Tájikstan, Sýdan, Pákistan, Qyrǵyzstan, Reseı, Koreı, Belarýs elderinen mergender qatysýda. Mundaı halyqaralyq saıystyń elimizde, onyń ishinde eńseli elordamyzda ótip jatqany biz úshin úlken mártebe jáne úlken jaýapkershilik.
Jarystyń maqsaty – mergendik daǵdyny jetildirýde tájirıbe almasý jáne dostyq qarym-qatynasty nyǵaıtý. Búgingi jarysta úzdiktiń úzdigi jeńis tuǵyrynan kórinedi dep senemiz», – dedi qalalyq Sport basqarmasynyń basshysy Samat Jylqybaev.
Aıta keteıik, atalmysh dodaǵa álemniń 10 elinen 125-ke jýyq mergen qatysýda. Olar bes kún boıy ártúrli qashyqtyq, jyldamdyq jáne túrli nysanaǵa oq atýdan kil myqtyny anyqtaıtyn bolady.
