Elordada sadaq atý boıynsha Astana Kýbogy úshin jarystar ótýde
ASTANA. 24 jeltoqsan. QazAqparat /Gúlmıra Álıakparova/ - Osy kúnderi Astanadaǵy «Jas batyr» sport kesheninde sadaq atý boıynsha Astana Kýbogy úshin ashyq jarystar ótýde.
Bul týraly elordalyq Týrızm, dene shynyqtyrý jáne sport basqarmasynan habarlady.
Jarysqa qalanyń eń myqty sadaq atýshylary qatysýda, solardyń ishinde halyqaralyq dárejedegi sport sheberi Elena Lı bar. Týrnır nátıjesi boıynsha Astana qalasynyń quramasy jasaqtalatyn bolady. Quramaǵa erler jáne áıelder komandalaryn qosa alǵanda barlyǵy 27 sportshy enedi.
Basqarma ókilderiniń aıtýynsha, atalmysh sport túri elorda jastary arasynda tanymaldylyqqa ıe bola bastady. Máselen, ústimizdegi jyly sadaq atýdy úırený toptaryna jazylǵandardyń sany 52 adamdy qurady. Bul kórsetkish buǵan deıingi jyldarmen salystyrǵanda asa joǵary. Búgingi kúni Astanadaǵy №9 balalar-jasóspirimder sport mektebinde 72 sportshy jattyǵady. Olar qalalyq jáne respýblıkalyq dárejedegi iri jarystarda jetistikti nátıjeler kórsetip júr.
Jarys jeńimpazdary búgin keshqurym belgili bolady.
