Elordada ruqsat etilmegen qoqys oryndarynan 37 myń tonnadan astam qaldyq jınaldy
NUR-SULTAN. QazAqparat – Nur-Sultan qalasynyń ákimi Altaı Kólginov Instagram paraqshasynda jyl basynan beri ekologııalyq polıtsııamen birlesip 50-den astam ruqsat etilmegen qoqys orny joıylǵanyn, al polıgonǵa 37 myń tonnadan astam qaldyq shyǵarylǵanyn málim etti.
«Qala aýmaǵynda ruqsat etilmegen qoqys tastaıtyn jerlerdi joıý boıynsha jumystardy jalǵastyrýdamyz. Óz paıdasy úshin nemese qatty-turmystyq qaldyqtardy arnaıy polıgonǵa shyǵarýǵa ýaqyt jumsaǵysy kelmeı zańnamany buzatyn ekologııa zııankesteri tarapynan mundaı is-áreketterdiń jolyn odan ári qatań túrde toqtatatyn bolamyz» dep jazdy qala basshysy.
Ákim keltirgen derekterge súıensek, tek osy jyldyń basynan bastap ekologııalyq polıtsııamen birlesip 50-den astam ruqsat etilmegen qoqys oryndary joıylǵan.
«Osy jyldyń basynan bastap ekologııalyq polıtsııamen birlesip 50-den astam ruqsat etilmegen qoqys oryndary joıdyq. Polıgonǵa 37 myń tonnadan astam qaldyq shyǵaryldy. Búgin qosymsha sharalar qabyldaý jáne QTQ úshin ruqsat etilmegen oryndardyń paıda bolýyna jol bermeý úshin aýdandyq ákimdiktermen, ekologııalyq polıtsııamen, qatty-turmystyq qaldyqtardy shyǵarýmen aınalysatyn kásiporyndarmen jáne t. b. kezdesý ótti.
Birinshi. Ekologııany jáne sanıtarlyq-epıdemıologııalyq jaǵdaıdy jaqsartý úshin osy jyldyń ózinde «Soltústik jotasy« karerin odan ári rekýltıvatsııalaı otyryp, qurylys qaldyqtaryn jınaýǵa jáne óńdeýge arnalǵan alań jumysyn bastaımyz.
Alańda kirpish, asfalt, beton qaldyqtary jáne t. b. sııaqty qurylys qaldyqtaryn qaıta óńdeıtin usatý keshenin ornatý qarastyrylǵan. Sonymen qatar, mysaly, qurylys qaldyqtarynyń 50%-yn qıyrshyq tasqa, 10-15%-yn armatýraǵa jáne t. b. óńdeýge bolady.
Ekinshi. Qoqys óńdeý zaýytyn jańǵyrtý jumystaryn jalǵastyramyz. Bul kásiporynnyń qýatyn eki esege – jylyna 250 myń tonnadan 450 myń tonnaǵa deıin arttyrýǵa múmkindik beredi. Qaldyqtardy suryptaý jartylaı avtomatty túrge aýystyrylady. Polıgonnyń ózi eki uıashyqtan turady.
Úshinshi. Qurylys qaldyqtaryn zańsyz oryndarǵa áketýdi toqtatý faktileri boıynsha qurylys nysandaryna monıtorıng jáne reıdter júrgizý boıynsha jedel toptyń jumysyn kúsheıtýdi tapsyrdym. Sebebi negizgi tártip buzýshylar - qurylys uıymdary.
Tórtinshi. Arnaıy bólingen oryndarǵa qoqys shyǵarý úshin kompanııalarmen kelisimshart jasaspaǵan qurylys kompanııalaryna qosymsha qorytyndy jasaý qajet. Qasaqana buzýshylyqtar bolǵan jaǵdaıda, biz qurylys nysandaryndaǵy jumys lıtsenzııasyn toqtata turamyz.
Besinshi. Zań buzýshylardy da 109ikomek-beınebaqylaý júıesi arqyly anyqtaımyz. Máselen, tek 20 sáýir men 31 mamyr aralyǵynda kameralar arqyly 24 tártip buzýshylyq faktisi tirkeldi. Júrgizýshiler jaýapqa tartyldy. Kameralar sanyn kóbeıtemiz», — dep jazdy elorda ákimi.
