Elordada reıd kezinde tártip buzǵan eki mekeme anyqtaldy

NUR-SULTAN. QazAqparat – Elordada polıtsııa qyzmetkerleri, ákimdik jáne Taýarlar men kórsetiletin qyzmetterdiń sapasy men qaýipsizdigin baqylaý basqarmasy ókilderinen qurylǵan top karantın rejımin buzýshylardy anyqtaý boıynsha jumysty jalǵastyrýda. Bul týraly QazAqparat Nur-Sultan qalasy polıtsııa basqarmasynyń baspasóz qyzmetine silteme jasap habarlaıdy.

Osylaısha, Pýshkın kóshesinde ornalasqan «ZARA» túngi klýby tyıym salynǵanyna qaramastan saǵat túngi 00:41-de kelýshilerdi qabyldap jatty. Tekseris kezinde munda jınalǵan 100-den astam klıenttiń áleýmettik qashyqtyq týraly umytyp, bı alańynda bılep, demalyp júrgeni anyqtaldy.

Sonymen birge, saǵat 01:00-de jastar kóńil kóterip júrgen taǵy bir mekeme anyqtalǵan. 150-ge jýyq kelýshi túngi ýaqytta «Tekıla» barynda alańsyz ýaqyt ótkizdi. Mekeme qyzmetiniń buǵan deıin bir aılyq merzimge toqtatylǵanyna qaramastan, bul bar kelýshilerdi qabyldaýyn toqtatpaǵan.

Mekeme ıelerine qatysty jınalǵan materıal QR Ákimshilik quqyqbuzýshylyqtar týraly kodeksiniń 425-baby boıynsha ákimshilik óndiristi qozǵaý úshin ókiletti organǵa jiberildi.

Jyl basynan beri karantın rejıminiń shekteý sharalary kezinde mobıldik toptar 540 reıdtik is-sharany ótkizip, sonyń barysynda 300-den astam buzýshylyqty anyqtady.

Nur-Sultan qalasynyń polıtsııa departamenti kásipkerlerdi karantın sharalaryn buzǵany úshin artylatyn jaýapkershilik týrly eskertip, sanıtarlyq normalardy saqtaýǵa shaqyrady.