Elordada retsiz qoıylǵan kólikterdi evakýatsııalaý júıesi kúsheıtilmek
ASTANA. KAZINFORM — Elordada retsiz qoıylǵan kólikterdi kommýnaldyq turaqqa evakýatsııalaý júıesi kúsheıtilmek. Bul týraly «Astana qalasynyń jol qozǵalysyn uıymdastyrý ortalyǵy» JShS dırektory Dáýren Sábıtov málim etti.
— Ortalyqtyń negizgi baǵyttarynda qaladaǵy turaqtardy basqarý, evakýatsııalanǵan kólikterdi saqtaý oryndaryn qadaǵalaý, jol júrýdegi qaýipsizdik erejesine qatysty jumysty qamtyp otyr. Tsıfrlyq monıtorıng boıynsha qazir qalada 12 apparattyq keshen jumys istep júr. Qaladaǵy joldardyń 30 paıyzyn ózimizdiń baqylaýda ustap otyrmyz. Negizgi maqsat — bul kórsetkishti 70 paıyzǵa jetkizý. Ol úshin taǵy 28 qurylǵyny satyp alýǵa tehnıkalyq-ekonomıkalyq negizdemeni ázirledik, — dedi Dáýren Sábıtov Astana qalasy máslıhatynyń kólik máseleleri jónindegi turaqty komıssııasynyń otyrysynda.
Sonymen qatar ol kólikterdi evakýatsııalaý men kommýnaldyq turaqtarǵa toqtaldy.
— Búginde bizdiń qoldanysta úsh evakýator ǵana bar. Bul rette sol jaǵalaýdaǵy MEGA Silk Way Astana aınalysynda atalǵan úsh kólik toqtaýsyz jumys istep jatyr. Jalpy, aıyna jol polıtsııasymen birge evakýatsııa boıynsha 700-den astam ótinim kelip túsedi. Aıyna orta eseppen 530 kólikti kommýnaldyq turaqqa jetkizip jatyrmyz. Onyń ishinde ereje buzýdyń 170 jaǵdaıy sol ornynda sheshiledi, ıaǵnı kólikti evakýatsııalamaı turyp avtomobıl ıesine SMS joldanady. Kólik ıesi aıyppulyn tólep, alyp ketedi, — dedi ortalyq basshysy.
Onyń sózine qaraǵanda, kommýnaldyq turaqtar qazir ózin-ózi aqtamaıdy.
— Sonymen qatar, evakýatsııaǵa 13 myń teńge máslıhatpen belgilengen tarıf qoıylǵan. Sáýir aıynan bergi jumysymyzdy úsh evakýator kólikke bólip, ketken shyǵyndy eseptedik. Búginde 7-8 AEK-ke deıin belgileý kerek degendi usynyp, tarıfti qaıtadan talqylaýdy jón sanaımyz. Máselen, Almatyda 30 evakýator jumys isteıdi. Osyǵan baılanysty elordaǵa taǵy 10 evakýator alýǵa ótinim berdik. Munymen qosa, kommýnaldyq turaqtardyń jaǵdaıyn jaqsartý jumysyn bastadyq, — dedi Dáýren Sábıtov.
Eske salsaq, Astanada zańsyz avtoturaqqa qarsy jańa baqylaý júıesi iske qosyldy.
