Elordada RES 2026 EXPO kórmesi ashyldy
ASTANA. KAZINFORM — Bul is-shara aımaqtaǵy jáne jahandaǵy ekologııalyq máselelerdi sheshýge septigin tıgizedi. Bul jóninde QR Ekologııa jáne tabıǵı resýrstar mınıstri Erlan Nysanbaev RES 2026 EXPO kórmesiniń saltanatty ashylý rásiminde málimdedi.
— Bul kórmege 30 elden 230 qatysýshy qatysyp, ónimderin usynyp otyr. Bul ekologııalyq máselelerge degen álem memleketteriniń qyzyǵýshylyǵy men alańdaýshylyǵyn kórsetedi, — dedi ol.
Sonymen qatar, mınıstr elimiz bul salaǵa basa mán beretinin atap ótti.
— Qazaqstan úshin ekologııalyq transformatsııa — strategııalyq baǵyt. Zamanaýı tehnologııalardy engizý, ınvestıtsııa tartý, halyqaralyq seriktestikti keńeıtý boıynsha barlyq jaǵdaıdy jasap kelemiz. Búgingi kórmede resýrstardy tıimdi paıdalaný, qaldyqtar men shyǵaryndylardy azaıtý, ekonomıkadaǵy turaqtylyqty arttyrý boıynsha sheshimder tanystyrylyp jatyr, — dedi ol.
Sondaı-aq, kórmeniń ashylý saltanatynda Qazaqstan Respýblıkasynyń Ekologııa jáne tabıǵı resýrstar mınıstrligi men Italııa Respýblıkasynyń Qorshaǵan orta jáne energetıkalyq qaýipsizdik mınıstrligi memorandýmǵa qol qoıdy. Qujatqa saı, taraptar ekologııa jáne klımattyń ózgerýi, jasyl tehnologııalardy engizý, tabıǵı resýrstardy tıimli paıdalaný baǵyttarynda birlesip jumys istemek.
Jalpy, quny 2,3 mlrd AQSh dollarynan asatyn 17 halyqaralyq kelisim, memorandým jáne ınvestıtsııalyq qujatqa qol qoıyldy.
Aıta keteıik, buǵan deıin BUU Ortalyq Azııadaǵy qaldyqtardy qaıta óńdeý máselesin kótergenin jazǵanbyz.