Elordada Red Bus ekskýrsııalyq avtobýstary júre bastady

NUR-SULTAN. QazAqparat – Nur-Sultan qalasynda Red Bus týrıstik avtobýstarymen ekskýrsııalar qaıta jandandy, dep habarlaıdy QazAqparat.

Elorda ákimdiginen málim etkendeı , jolaýshylardyń qaýipsizdigin qamtamasyz etý maqsatynda árbir aınalymnan soń avtobýs ishi kvartstalyp, dezınfektsııalanady.

«Red Bus ekskýrsııalyq avtobýstary óz jumysyn bastaǵanyn qýana habarlaımyz! Biz aýdıogıdimizdi jańartyp, qosymsha jańa baǵyt – Esil ózeniniń jaǵalaýyn qostyq», – delingen habarlamada.

Qaýipsizdik maqsatynda ár aınalym saıyn avtobýs kvartstalyp, arnaıy dezınfektsııa quraldarymen óńdeledi. Salonda qoldy tazartý úshin antıseptık ornatylǵan jáne ár adamǵa birrettik qulaqqaptar beriledi. Barlyq jolaýshylar ekskýrsııa barysynda avtobýs ishinde maska taǵyp otyrýy kerek.

Red Bus avtobýstary kún saıyn, demalyssyz qatynaıdy. Jóneltý orny – «Esil ózeniniń jaǵalaýy» aıaldamasy, 10:00, 12:50, 15:20 jáne 18:10.

Aıaldamalar:

Esil ózeniniń jaǵalaýy «Han-Shatyr» SOO

«Máńgilik el» saltanat qaqpasy

«Nur-Álem» mýzeıi

Ulttyq mýzeı

«Báıterek» monýmenti

«Ailand» okeanarıýmy

Aıta keteıik, koronavırýs qaýpine baılanysty josparlanǵan keste boıynsha astanada 15 maýsymnan bastap balabaqshalar, kınoteatrlar men OSO-daǵy oıyn ortalyqtary ashylmaıtyn boldy.

Búgin tańerteń Nur-Sultan ákimi Altaı Kólginov elordalyqtarǵa taǵy úndeý jasap, qonaqqa jáne otbasylyq meıramdarǵa barýdan bas tartýdy surady.