Elordada radıo kúnine oraı «ASYL MURA» etnofestıvali ótti
ASTANA. KAZINFORM – Astanadaǵy «Jeti qazyna» etnoparkinde radıo kúnine oraı Qazaq radıosynyń uıymdastyrýymen «ASYL MURA» degen atpen etnofestıval ótti.
Etnofestıvalde atpen serýen, búrkit pen tazylar shoýy, etno-defıle men ulttyq bı jáne qyzyqty konkýrstar uıymdastyryldy. Atap aıtqanda, «Eń úzdik ulttyq kıim», «Eń uzyn burym», «Úzdik etnokartına», «Úzdik otbasy» nomınatsııalary boıynsha jarys ótkizildi.
Aıta keteıik, osydan 4 jyl buryn Memleket basshysy Qasym-Jomart Toqaev 1 qazandy «Radıo kúni» dep jarııalady. Mine, sodan beri bul kún radıo qyzmetkerleriniń kásibı merekesine aınaldy. Etnofestıval sol ataýly kúnge oraı ótkizilip otyr.
Bul jolǵy sharada ulttyq sportty, mádenıetti, qolónerdi, ulttyq salt-dástúrdi nasıhattaýǵa arnalǵan eken.
Atap aıtar bolsaq, tekemet-shoý, kıiz úıler, ulttyq taǵamdar, qymyzmuryndyq, qolóner jármeńkesi jáne Qazaqstan estrada juldyzdarynyń qatysýmen gala-kontsert boldy. Festıvalde qazaqtyń ulttyq oıyndary da jıylǵan qaýym nazaryna usynyldy.
Etnofestıvalge kelýshiler qyzyqty kontsert tamashalap, ártúrli ulttyq taǵamdardan dám tatty.
Atalǵan is-sharany uıymdastyrýshylardyń biri «Qazaq radıolary» JShS Bas dırektory Nurtas Kósherov bul etnofestıval asyl muramyzdy halyqqa nasıhattaý maqsatynda ótkizilgenin aıtty.
– 2021 jyldan beri QR Prezıdentiniń tapsyrmasymen Radıo kúni atalyp ótedi. Bul – bizdiń kásibı merekemiz. Osy mereke qarsańynda Astana qalasyndaǵy «Jeti qazyna» etnoparkinde «ASYL MURA» degen atpen festıval ótkizip otyrmyz. Bul jolǵy is-sharany ótkizýdegi maqsatymyz – qazaq radıosy tek ulttyń ónerin, ánin, termesin, jyryn ǵana dáripteýshi ǵana emes, sonymen qatar qazaqtyń ulttyq sportyn, mádenıetin, qolónerin, salt-dástúrin nasıhattaýshy ekenin kórsetý, - dedi N.Kósherov.
Sondaı-aq Nurtas Soltanuly atalǵan sharaǵa qatysyp jatqan barlyq kásipker eshqandaı tólem tólemeı-aq óz saýdalaryn jasap, kásibin nasıhattaı alatynyn jetkizdi.
Atap óterligi, ulttyq dástúr men óner toǵysqan merekede atpen serýen, búrkit pen tazy shoýy, etno-defıle jáne san túrli saıystar kelýshilerge erekshe áser syılady.
Keshtiń eń negizgi atap aıtar ereksheligi kelýshi qonaqtar kóńilinen shyqqan Gala-kontsert boldy. Túrli óner men dástúr toǵysqan sahna qonaqtardy merekelik kóńil kúıge bóledi.
Etnofestıval sońynda qyzyqty konkýrstardyń jeńimpazdary anyqtaldy.
Úzdik ulttyq kıim:
1 oryn - Kerbez Nodes toby
2 oryn - Nuraı Esmaǵulova
3 oryn - Jýsan klýby
Úzdik januıa - 95 jastaǵy Zıhan ana bastaǵan Ádilhan otbasy.
Uzyn burym:
1 oryn - Batıma Bekturǵan
2 oryn Oshanbaı Nuraıym
3 oryn Qanarhan Raıana
Ulttyq qolóner:
1 oryn Orazǵalıev Arhat
2 oryn Bımendına Sara
3 oryn Maǵdanova Qurlaı
Sadaq atý:
1 oryn Almısaeva Nazym
2 oryn Mamajanova Aqbota
3 oryn Maýına Gúlsán.
«Asyl mura» etnofestıvaliniń eń qundy syılyǵy Túrkııaǵa eki adamdyq tegin joldama bolatyn. Atalǵan júldeni utyp alý úshin ótip jatqan búgingi festıval jaıly úzdik kreatıvıti vıdeo jarııalaý kerek. Bul baıqaýda Raqymjan Eraly esimdi azamat jeńimpaz dep tanyldy. Áleýmettik jelide úzdik vıdeo jarııalaǵan qatysýshyǵa Túrkııaǵa joldama tabystaldy.
