Elordada pyshaqtalǵan meshit qyzmetkeriniń jaǵdaıy óte aýyr
ASTANA. QazAqparat – Astanadaǵy meshitterdiń birinde birneshe jerinen pyshaq suǵylǵan azamattyń jaǵdaıy óte aýyr, dep habarlaıdy QazAqparat tilshisi.
Qoǵamdyq densaýlyq saqtaý basqarmasy patsıenttiń qazirgi jaǵdaıy týraly aqparat berdi.
«14 naýryzda jedel járdem brıgadasy naýqasty №3 kópbeıindi qalalyq aýrýhanaǵa jetkizdi. Patsıent birneshe jerden pyshaq jaraqatyn alǵan, jaǵdaıy aýyr. Naýqasqa shuǵyl em júrgizildi. Qazir naýqastyń jaǵdaıy óte aýyr. Patsıentti aman alyp qalý maqsatynda reanımatsııa jáne ıntensıvti terapııa bóliminde em jalǵasyp jatyr», - deıdi vedomstvodan.
Habarlamada aıtylǵandaı, naýqasqa tolyq kólemde em kórsetilip jatyr. Sondaı-aq, bolǵan jaıtqa qatysty Polıtsııa departamenti túsinik berdi.
«Atalǵan fakti boıynsha Astana qalasy Polıtsııa departamentiniń Saryarqa aýdandyq polıtsııa bólimi sotqa deıingi tergeýdi bastady. Barlyq qajetti saraptamalar taǵaıyndaldy. Aıypty oqıǵa ornynda ustaldy. Ol qazir ýaqytsha ustaý ızolıatorynda qamaýda», - dep habarlady departamenttiń baspasóz qyzmeti.
QR Qylmystyq-protsestik kodeksiniń 201-babyna sáıkes sotqa deıingi tergep-tekserý men ózge de derekter jarııa etýge jatpaıdy.
Buǵan deıin Qazaqstan musylmandary dinı basqarmasynyń baspasóz hatshysy Aǵabek Qonarbaıuly oqıǵaǵa kúdikti men onyń áıeli arasyndaǵy daý-janjal sebep bolǵanyn habarlaǵan bolatyn.
