Elordada PTR testten ótý aqysy qansha
NUR-SULTAN. QazAqparat – Elordada koronavırýs ınfektsııasy boıynsha PTR testten ótý aqysy qansha bolady? Bul suraqqa Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova jaýap berdi, dep habarlaıdy QazAqparat tilshisi.
«Jalpy tekserýden tıisti azamattar (ıaǵnı vırýs juqtyrý kúdigine ilingender men koronavırýsty juqtyrǵan azamattarmen qarym-qatynasta bolǵandar) ótedi. Onyń bári tegin. Al Almaty men Nur-Sultan qalasy arasynda áýe reısiniń qalpyna keltirilýine baılanysty ol endi mindetti túrde ótetin jaǵdaı (...) Qalada birneshe zerthana bar. Jaýapkershiligi jeke ujymdardyń baǵalarynyń mólsheri 11-20 myń teńge arasynda», - dedi Sáýle Qısyqova Densaýlyq saqtaý mınıstrliginiń Facebook-tegi paraqshasynda bergen suhbatynda.
Basqarma basshysy PTR testten kimder tegin óte alatynyn aıtyp ótti.
«Aldyn ala tekserý jumystaryna sáıkes tizimge engen azamattar, ıaǵnı indetti juqtyrǵandarmen jaqyn qarym-qatynasta bolǵandardyń bári tegin ótedi. Odan bólek aldyn alý jumystary boıynsha PTR testterden medıtsınalyq qyzmetkerlerdi ótkizemiz. Blok-postta qyzmette turǵandardy, memlekettik-áleýmettik uıymdardaǵy azamattardy da testpen tekseremiz. Qazir biz elordada №2 emhanany bólip qoıdyq. ıAǵnı JRVI ınfektsııasyn juqtyrǵan azamattar da sol jerge tegin túrde ótedi. Búgingi kúni №6 jáne №9 emhanada provızorlyq bólimshelerdi ashyp qoıdyq. Bul klınıkaǵa jatqyzylar aldynda naýqastar sol jerde mindetti túrde testten ótedi. Sonymen qatar júkti áıelderde 37-shi aptada PTR testterden ótkizemiz», - dedi ol.
