Elordada «Prezıdent Toqaevtyń dıplomatııasy» atty monografııa tanystyryldy
ASTANA. KAZINFORM — Búgin Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýtynda Memleket basshysy Qasym-Jomart Toqaevtyń dıplomat retindegi qyry jańadan baıandalǵan kitaptyń tusaýy kesildi.
Avtorlardyń aıtýynsha, «Prezıdent Toqaevtyń dıplomatııasy» atty monografııada Qazaqstan Respýblıkasy Prezıdenti Qasym-Jomart Toqaevtyń memleket basshysy retindegi syrtqy saıasat baǵytyna jan-jaqty taldaý jasalǵan.
Negizgi nazar onyń dıplomatııasynyń úsh basty qaǵıdatyna, sondaı-aq eldiń syrtqy saıasatyn zamanaýı jahandyq syn-qaterlerge beıimdeýge aýdarylǵan. Oǵan Aýǵanstan men Ýkraınadaǵy daǵdarys, klımattyń ózgerýi jáne ózge de kún tártibindegi halyqaralyq máseleler jatady.
Sonymen qatar erekshe kóńil kórshi saıasatyna, óńirlik ıntegratsııaǵa jáne álemniń jetekshi derjavalary Reseımen, Qytaımen, AQSh-pen jáne Eýropalyq odaqpen ózara is-qımylyna bólingen. Bólek bir taraý Qazaqstannyń BUU, ShYU, UQU jáne AÓSShK sııaqty halyqaralyq uıymdardaǵy róline arnalǵan.
Kitapta Qazaqstannyń geosaıası turaqsyzdyq jaǵdaıynda syndarly dıalogqa, múdde tepe-teńdigine jáne jahandyq turaqtylyqty nyǵaıtýǵa umtylysy aıqyn kórsetilgen.
— Bul ishki saıasatpen aınalysatyn ǵylymı qyzmetkerlerdiń birlesken jumysy. Týyndy birneshe maqsatty kózdeıdi, aldymen álemdegi qaýipsizdik onyń ishinde geosaıası jaǵdaıdyń da arhıtektýrasy ózgergen. Syrtqy saıasattyń tendentsııasy ózgergennen keıin Qazaqstannyń saıasaty oǵan beıimdele alý kerek. Bizdiń syrtqy saıasattaǵy basty prıntsıp — kópvektorlyq. 30 jyl boıy saqtap kele jatqan kópvektorlyqty saqtap qalý óte qıyn, óıtkeni álemde kóptegen protsess júrip, geosaıası jaǵdaı jıi ózgerip otyr. Halyqaralyq uıymdar qyzmetin transformatsııalap jatyr. Sonyń negizinde Qazaqstannyń syrtqy saıasatyna taldaý jasaldy, — dedi Prezıdent janyndaǵy Qazaqstannyń strategııalyq zertteýler ınstıtýty dırektorynyń orynbasary Alýa Joldybalına aıtýly is-sharada.
Sarapshynyń aıtýynsha, kitapta elimizdiń tek syrtqy saıasaty ǵana aıtylmaıdy.
— Sońǵy 5-10 jylda kórip otyrmyz, syrtqy saıasat ishki saıasatqa qatty áser etedi. Memlekettiń ishki saıası júıesi syrtqy saıasat faktorlaryna beıim bolýy kerek. Saıası reformalar memlekettiń ózi úshin ǵana emes, syrtqy saıasatqa da negizdelip jasalady. Bul kitapta ishki saıasat pen syrtqy saıasat baılanysy baıandalǵan. Úshinshiden ekonomıkasyz syrtqy saıasat bolmaıdy, sondyqtan týynda ekonomısterge de paıdaly, óıtkeni, kelisimderdiń barysynda árdaıym ekonomıkalyq máseleler kóteriledi. Eger memleketter arasyndaǵy qarym-qatynas sátti bolsa, bul ekonomıkaǵa da yqpaly zor, — deıdi ol.
Atalǵan basylym halyqaralyq qatynas salasynyń mamandaryna, saıasattanýshylarǵa, sondaı-aq ózgermeli álemdegi Qazaqstannyń strategııalyq baǵytyna qyzyǵýshylyq tanytqan barsha oqyrmanǵa arnalǵan.
Eske salaıyq, Memleket basshysy Qasym-Jomart Toqaev Qazaqstan beıbit jáne teńgerimdi syrtqy saıasatty qatań ustanyp keletinin basa aıtqan edi.