Elordada polıtsııa sıntetıkalyq esirtki jetkizý arnasynyń jolyn kesti
ASTANA. KAZINFORM - Qalaǵa kireberiste esirtki saýdalaýy múmkin degen kúdikpen Hyundai avtokóliginiń 30 jastaǵy júrgizýshisi ustaldy, dep habarlaıdy Polisia.kz.
Anyqtalǵandaı, ol elordaǵa kelgen boıda esirtki jasyratyn oryn daıyndap úlgergen.
Kólikke júrgizilgen tintý barysynda untaq tárizdi zat salynǵan kapsýla tabylyp, onyń mefedron ekeni anyqtaldy. Keıinnen kúdikti taǵy eki jasyryn orynnyń mekenjaıyn kórsetip, ol jerlerden qosymsha esirtki partııalary tabylyp, tárkilendi. Tárkilengen mefedronnyń jalpy salmaǵy shamamen jarty kelini qurady.
Esirtki zattaryn saqtaý jáne ótkizý faktisi boıynsha qylmystyq is qozǵaldy. Kúdikti ustalyp, ýaqytsha ustaý ızolıatoryna qamaldy. Tergeý barysynda kúdiktiniń elorda turǵyny ekeni jáne esirtkini iri partııalarmen jetkizip, keıin ony qala aýmaǵynda jáne elimizdiń birqatar óńirinde taratýmen aınalysqany anyqtaldy.
Polıtsııa qyzmetkerleriniń jedel ári kásibı is-qımylynyń nátıjesinde sıntetıkalyq esirtkini jetkizý jáne taratý arnasynyń joly kesildi.
Polıtsııa esirtkiniń zańsyz aınalymy aýyr qylmystar sanatyna jatatynyn jáne qatań qylmystyq jaýapkershilikke ákep soǵatynyn eskertedi.
-Esirtki zattaryn jetkizý, saqtaý jáne taratý arnalaryn anyqtaý men olardyń jolyn kesý baǵytyndaǵy jumystar turaqty jú.úrgizilip keledi. Esirtki taratýdan zańsyz paıda tabýǵa baǵyttalǵan kez kelgen áreket mindetti túrde qylmystyq qýdalaýǵa jáne bas bostandyǵynan aıyrý jazasyna ákeledi,-delingen habarlamada.
Osyǵan deıin eldiń batysynda iri esirtki arnasynyń joly kesilgeni týraly jazdyq.
