Elordada polıtseıler esirtki saqtady degen kúdikpen eki er adamdy ustady

ASTANA. KAZINFORM – «Qarasora» jedel-profılaktıkalyq is-sharasy barysynda elordalyq polıtseıler esirtki saqtady degen kúdikpen eki adamdy qolǵa túsirdi.

Polisia.kz-tiń málimetinshe, Esil aýdanynyń krımınaldyq polıtsııa qyzmetkerleri Túrkistan kóshesinde kúdik týdyrǵan VAZ 2109 avtokóligin toqtatqan. Kólikti tintý barysynda jedel ýákilder aqshyl-sarǵysh tústi untaq tárizdi zat salynǵan 4 oramdy taýyp, tárkiledi.

Sarapshynyń qorytyndysyna sáıkes, bul zat mefedron esirtki quraly bolyp shyqty. Belgili bolǵandaı, kúdiktiler esirtkini jeke tutyný úshin áleýmettik jeli arqyly satyp alǵan.

Atalǵan derek boıynsha qylmystyq is tirkeldi.

36 jáne 30 jastaǵy eki er adamdy medıtsınalyq kýálandyrý kezinde olardyń esirtki zatyn qoldanǵany anyqtaldy. Osyǵan baılanysty sot sheshimimen kúdiktiler jaýapqa tartylyp, arnaıy qabyldaǵyshqa qamaldy. 10 táýliktik merzim aıaqtalǵannan keıin, tergeý júrgizilgenshe, ýaqytsha ustaý ızolıatoryna aýystyrylady.

Polıtsııa elordanyń turǵyndary men qonaqtaryn zańsyz esirtki saqtaýǵa qatysty qandaı da bir aqparat bolǵan jaǵdaıda dereý «102» nómiri arqyly polıtsııaǵa habarlasýǵa shaqyrady. 

Eske sala keteıik, buǵan deıin Soltústik Qazaqstan oblysyndaǵy №51 túzeý mekemesine psıhotropty zatty kirgizbek bolǵan adamǵa qatysty qylmystyq is qozǵalǵanyn jazǵan edik.