Elordada polıtseıler 84 jastaǵy qarttyń 13 mln teńgesin qoldy etken droppelerdi ushaqta ustady

ASTANA. KAZINFORM - Astanada tártip saqshylary 84 jastaǵy qarııany 13 mıllıon teńgege aldap soqqan alaıaqtyq shemany áshkereledi, - dep habarlaıdy Polisia.kz.

Belgili bolǵandaı, qylmyskerler jábirlenýshimen baılanysyp, ózderin quqyq qorǵaý organdarynyń qyzmetkerleri retinde tanystyrǵan. Olar telefon arqyly egde jastaǵy áıelge onyń ápkesi jol-kólik oqıǵasyna kináli dep jalǵan aqparat jetkizgen. Jaraqat alǵan adamdy shuǵyl emdeýge qarajat qajet degen syltaýmen alaıaqtar áıeldi qomaqty somany qolma-qol tapsyrýǵa kóndirgen.

Aldanǵanyn kesh túsingen qarııa birden polıtsııaǵa júgindi. Jedel-izdestirý sharalary barysynda tártip saqshylary kúdiktilerdi anyqtap, olardyń elden áýe reısi arqyly ketýge tyrysyp jatqanyn anyqtady. Polıtseıler qaskóılerdi tikeleı ushaq ishinde qolǵa túsirdi. Tekserý barysynda kúdiktilerden 11 myń AQSh dollarynan astam qarjy tárkilendi.

Anyqtalǵandaı, olar aqshanyń bir bóligin jumsap úlgergen. Qazirgi tańda atalǵan derek boıynsha sotqa deıingi tergeý amaldary júrgizilýde. Kúdiktiler – kórshi eldiń azamattary. Olar Astana qalasy polıtsııa departamentiniń ýaqytsha ustaý ızolıatoryna qamaldy.

Astana qalasy polıtsııa departamenti azamattardy saq bolýǵa shaqyrady.

- Quqyq qorǵaý organdarynyń atyn jamylǵan beıtanys adamdarǵa senbeýge, kúmándi jaǵdaılarda jaqyndaryńyzben keńesip, birden polıtsııaǵa habarlasýǵa keńes beredi. Ásirese, egde jastaǵy adamdardyń alaıaqtardyń negizgi nysanasyna aınalatynyn eskere otyryp, olarǵa mundaı jaǵdaılarda qalaı áreket etý kerektigin túsindirý mańyzdy,- delingen habarlamada.

Osyǵan deıin polıtsııa alaıaqtyq qońyraýlardyń aldyn alyp, 24 myńnan astam sim-karta tárkilegeni týraly jazdyq.