Elordada polıetılen paketterin qoldanýǵa qarsy shara ótti
NUR-SULTAN. QazAqparat – «Jasyl el» eńbek jasaqtarynyń Respýblıkalyq shtaby «ECO Pack» ekologııalyq naýqanyn uıymdastyrdy, dep habarlaıdy QazAqparat uıymnyń basnpasóz qyzmetine silteme jasap.
Qazaqstan Respýblıkasy Tuńǵysh Prezıdenti – Elbasy Qorynyń qoldaýymen ótken jobanyń aıasynda 700-den 1000 jylǵa deıin ydyraıtyn polıetılendi paketter kóp mártelik eko-dorbalarǵa aýystyryldy.
«Bıyl biz «ECO Pack» jobasyn alǵash ret uıymdastyryp otyrmyz. Bul ekologııalyq naýqandy uıymdastyrýdaǵy maqsatymyz – jahandyq jylyný, qorshaǵan ortanyń lastanýy, qoqystardyń tabıǵatqa tıgizetin zııany syndy ekologııalyq máselelerge jurtshylyqtyń nazaryn aýdarý. Eko-dorbalar planetamyzdyń ekologııasyn jaqsartýǵa kóp úles qosady. Polıetılendi paketterge qaraǵanda, tabıǵı matadan jasalǵan eko-dorbalar birneshe aıdyń ishinde ydyrap, topyraqty organıkamen baıytady. Osy syndy ekologııalyq naýqandar tek qana Elordamyzda emes, Qazaqstannyń barlyq óńirlerinde júzege asyp keledi», - dedi «Jasyl el» eńbek jasaqtary Respýblıkalyq shtabynyń jetekshisi Azamat Danııar.
Aıta ketsek, ECO Pack – bul ekologııanyń kókeıkesti máseleleri men qorshaǵan ortany qorǵaý máselesine qoǵamnyń nazaryn aýdartýǵa baǵyttalǵan ekologııalyq naýqan. Bul naýqannyń maqsaty – ekologııalyq mádenıet qalyptastyrý, qorshaǵan ortaǵa qundylyq retindegi qarym-qatynas ornatý men tabıǵat resýrstaryn tıimdi qoldanýǵa nazar aýdarý.
