Elordada polıtsııanyń 316 qoǵamdyq kómekshisi marapattalady
ASTANA. 29 jeltoqsan. QazAqparat - Elordanyń ishki ister departamenti qalalyq ákimdiktiń qoldaýymen toqsan saıyn qoǵamdyq tártipti saqtaýdy qamtamasyz etip, qylmystyń ashylýyna qol ushyn beretin azamattardy marapattaıdy. Bul týraly Astana qalasynyń resmı saıty ІІD baspasóz qyzmetine silteme jasap habarlady.
«2012 jyldyń tórtinshi toqsanynyń qorytyndysy boıynsha polıtsııanyń 316 qoǵamdyq kómekshisi árqaısysy 15 myń teńgeden aqshalaı syılyqqa ıe boldy.
Olardyń 62-si shuǵyl-jastar otrıadynyń stýdenti, 87-si memlekettik emes qurylymdardyń kúzetshileri, 20-sy polıtsııa bólimshesi janyndaǵy ІІB ardagerleri jáne 147-si konserjder», - delingen habarlamada.
Vedomstvonyń málimeti boıynsha, jyl basynan beri polıtsııanyń qoǵamdyq kómekshileriniń kómegimen 153 qylmys ashylyp, 8 291 quqyq buzýshy ákimshilik jaýapkershilikke tartyldy.
