Elordada polıtsııa qyzmetkerleri soǵys ardagerine izet kórsetti

NUR-SULTAN. QazAqparat – QR ІІM Ardagerler keńesiniń tóraǵasy Ómirzaq Bolsambekov pen Nur-Sultan qalalyq PD Ardagerler keńesiniń tóraǵasy Qarshyǵa Kishkentaev 94 jastaǵy ekinshi dúnıejúzilik soǵys ardageri Óten Mustafınniń úıine bardy, dep habarlaıdy QazAqparat tilshisi.

Olar soǵys ardagerin Jeńis merekesimen quttyqtap, maıdan dalasynda kórsetken janqııarlyq erligi úshin alǵys bildirip uzaq ǵumyr tiledi. Sonymen qatar Óten Mustafınge estelik medal tabys etti.

«Biz sizderdiń aldaryńyzda máńgilik qaryzdarmyz. Beıbit ómir úshin qaharmandyq tanytyp, janqııarlyq erlik jasadyńyzdar. Sizderdiń aldaryńyzda basymyzdy ıemiz jáne myqty densaýlyq, baqýattylyq pen beıbitshilik tileımiz», -dedi Ómirzaq Bolsambekov.

Nur-Sultan qalalyq polıtsııa departamentiniń málimetinshe, Óten Mustafın 1926 jyldyń 15 tamyzynda Qostanaı oblysynyń Meńdiqara aýdanynda dúnıege kelgen. Ásker qataryna 1944 jyldyń 15 jeltoqsanynda alynyp, 1945 jyldyń naýryzynda ІІ Belarýs maıdanyna, Mınsk qalasyn jaýdan azat etýge, sáýirde 303 atqyshtar polkiniń quramynda Oder ózeni úshin bolǵan úlken shaıqasqa qatysqan. Elge kelgen soń ishki ister bólimine jumysqa ornalasyp, 1981 jyly zeınetkerlikke shyqqan. Maıdandaǵy erligi úshin ІІ dárejeli Otan soǵysy ordenimen jáne 6 merekelik medalimen, ishki ister salasyndaǵy úzdik qyzmeti úshin 5 medalmen marapattalǵan.