Elordada polıtsııa qaltaǵa túskish ákki uryny ustady

NUR-SULTAN. QazAqparat – Polıtsııaǵa qaltasyndaǵy zaty joǵalǵan turǵyndar shaǵym túsirdi. Barlyq urlyq avtobýsta nemese aıaldamada bolǵan. Qalta urysy mundaı jerlerde adam kóptigin paıdalanyp, jolaýshyǵa jaqyndap, sáti túsken kezde sómke men syrtqy kıim qaltasynan telefon men ámııandy urlaǵan, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.

Birneshe ret aryz túskennen keıin jedel qyzmetkerler birden qoǵamdyq kólik marshrýty men aıaldamalardy teksere bastady. Jedel izdestirý sharalaryn júrgizý barysynda polıtsııa qyzmetkerleri qylmys ústinde 30 jastaǵy kúdiktini ustady.

Kúdikti buryn urlyq jasaǵany úshin birneshe ret sottalǵan bolyp shyqty. Polıtseıler onyń bes ret qaltaǵa túskenin anyqtady. Qazirgi kezde onyń astana aýmaǵyndaǵy basqa ashylmaǵan qylmystarǵa qatysy bar-joqtyǵy tekserilip jatyr.

Atalǵan faktiler boıynsha QR QK-nyń 188-babyna sáıkes sot aldy tergeý júrip jatyr. Kúdikti ýaqytsha ustaý ızolıatoryna qamaldy. Elordanyń polıtsııa departamenti azamattardy muqııat bolýǵa shaqyrady. Qalta urylary qarbalas sátti paıdalanýǵa tyrysady. Olar uıaly telefon men ámııandardy urlaıdy.

Polıtseıler adam kóp jerlerde jeke zatqa muqııat bolýdy, sómkeni nazardan tys qaldyrmaýdy, qundy zattardy ońaı alynatyn jerde saqtamaýdy usyndy. Kúdikti adamdy baıqaǵan jaǵdaıda, birden 102 nómiri nemese polıtsııanyń uıaly qosymshasyna habarlasý kerek.