Elordada polıtsııa aǵaıyndy urylardy ustady
NUR-SULTAN. QazAqparat - Elordalyq polıtseıler kúndiz úıler men baraktardy tonaǵan eki aǵaıyndyny ustady, dep habarlaıdy QazAqparat ElordaInfoǵa silteme jasap.
Urylar sońǵy joly Baıqońyr kóshesindegi úıden áıeldiń qarakúzen ishigin urlaǵan. Esiktiń qulyptalmaǵanyn paıdalanyp, olar úıge kirip, quny 150 myń teńge turatyn ishikti alyp ketken, dep habarlaıdy Nur-Sultan qalalyq Polıtsııa bóliminiń baspasóz qyzmeti.
Sotqa deıingi tergeý barysynda olar urlanǵan zatty lombardqa kepilge berip, ol jerden 20 myń teńge alyp shyqqany anyqtaldy. Sondaı-aq, polıtsııa qyzmetkerleri urynyń úıinen basqa da urlanǵan zattardy tárkiledi.
Ustalǵan 47 jáne 40 jastaǵy aǵaıyndylar kinásyn moıyndady. Ekeýi de buryn sottalǵan. Aıǵaq zattar tárkilendi. Polıtseıler ustalǵan kúdiktilerdiń bes epızod boıynsha aıybyn dáleldedi.
Ustalǵandar ýaqytsha ustaý ızolıatoryna qamaldy. Olardyń ústinen QR QK-niń «Urlyq» baby boıynsha sotqa deıingi tergeý júrgizilip jatyr.
Polıtsııa departamenti jyl basynan beri zań urlyq úshin jaýapkershilikti kúsheıtkenin eske salady. Endi qylmystyń bul túri aýyr sanatqa aýysty. Aıyptynyń múlki tárkilenip, úsh jyldan jeti jylǵa deıin bas bostandyǵynan aıyrý jazasy qarastyrylǵan. Sondaı-aq, mámilege kelý de alyp tastalǵan.
