Elordada polıtseıler 4-shi qabattan sekirmek bolǵan er adamdy qutqardy
NUR-SULTAN. QazAqparat – Oqıǵa Jansúgirov kóshesindegi kópqabatty turǵyn úıde oryn alǵan. Er adamnyń joǵary qabattan sekirmek bolǵanyn kórgen kýágerler polıtsııaǵa qońyraý shalǵan, dep habarlaıdy QazAqparat Nur-Sultan qalasynyń polıtsııa departamentine silteme jasap.
Oqıǵa ornyna kelip jetken patrýldik polıtsııa polkiniń ınspektorlary – aǵa leıtenant Rýslan Búrkitbaev pen leıtenant Jasulan Qumarhanov úı balkonynyń taıanyshynda otyrǵan er adamdy kórdi.
Polıtseıler úıge kirgen. Al páter ishinde er adamnyń ákesi júrgen, ol balasyn tómenge sekirmeýge kóndirýge tyrysty. Polıtseıler de er adamdy áńgimege tartty. Sondaı-aq, oqıǵa ornyna qutqarý qyzmetkerleri kelip, álgini balkon taıanyshynan ishke qaraı ıtere bastaǵan. Polıtseıler sol mezette er adamdy qapsyra ustap, ishke tartyp aldy.
Qutqarylǵan 33 jastaǵy er adam medıtsınalyq qyzmetkerlerge tapsyryldy.
«Biz kúızeliste júrgen adamnyń qandaı áreketke baratynyn bilmegendikten, jaǵdaıǵa qaraı áreket jasadyq. Onyń tómenge sekirmeýi úshin bar kúshimizdi saldyq», - dedi R.Búrkitbaev.
Bul polıtsııa qyzmetkeriniń qyzmet júrgizý kezindegi birinshi erligi emes.
