Elordada Pfizer vaktsınasyn qaı jerlerde saldyrýǵa bolady

NUR-SULTAN. QazAqparat - Qalalyq densaýlyq saqtaý basqarmasynyń habarlaýynsha, elordada Pfizer vaktsınasy medınalyq uıymdar men Abu Dhabi Plaza saýda jáne oıyn-saýyq ortalyǵyndaǵy ekpe egý beketinde qoljetimdi, dep habarlaıdy QazAqparat.

Sondaı-aq, atalǵan mekeme vaktsınatsııa modýline Pfizer vaktsınasy boıynsha tıisti ózgerister engizilip jatqanyna nazar aýdaryp, patsıenttiń derekterin sandyq bazaǵa, ıaǵnı elektrondy túrde engizý áli múmkin emes ekenin habarlady.

Bul jumys biraz ýaqyt qaǵaz júzinde júrgiziledi.

Shetelge shyǵatyn adamdarǵa rastaıtyn qujattar usynylǵan kezde KVI-ǵa qarsy vaktsınatsııalaýdyń tolyq kýrsyn qaıtadan júrgizýge jol beriledi.

Bul rette vaktsınany tańdaý saparǵa shyǵý josparlanǵan eldiń talaptaryna baılanysty júrgiziledi.

KVI-ǵa qarsy sońǵy ekpe men KVI-ǵa qarsy vaktsınatsııanyń qaıtalama tolyq kýrsy arasyndaǵy aralyq keminde 3 aı dep usynylady.