Elordada pedagogtar men stýdentter JOO-ǵa Ashyq arqyly kirgiziledi

NUR-SULTAN. QazAqparat – Nur-Sultan qalasynyń ákimi Altaı Kólginov joǵary oqý oryndarynyń rektorlarymen aldaǵy oqý jylyna daıyndyq barysyn talqylady, dep habarlaıdy QazAqparat.

«Bir aıdan soń oqýshylar men stýdentter úshin jańa oqý jyly bastalady. Oqý oryndaryn offlaın formatta qaıta ashý úshin qalada aýqymdy vaktsınatsııa júrgizilip jatyr. Vaktsınatsııa óz densaýlyǵyńyzdy, jaqyndaryńyz ben aınalańyzdaǵy jandardyń densaýlyǵyn qorǵaýǵa múmkindik beredi. Ujymdyq ımmýnıtetti der kezinde qalyptastyra otyryp, qalypty ómirge orala alamyz», - dep jazdy A.Kólginov Instagram-paraqshasynda.

Ákimniń málimetinshe, elordada barlyǵy 17 JOO bolsa, sonyń 11-i búginde Ashyq jobasyna qosylǵan. «Ol oqytýshylar men stýdentterdi qaýipten qorǵaýǵa múmkindik beredi. Qalǵan ýnıversıtetter de Ashyq jobasyna qosylýy kerek. Sonymen qatar, oqý oryndaryn sanıtaızerlermen jabdyqtaý, medıtsınalyq pýnkterdiń jumysyn kúsheıtý, stýdentter aǵynyn úılestirýdi uıymdastyrý jáne taǵy basqasy qajet.Oqytýshylar men stýdentter (18 jastan asqan) ekpe alýy tıis. Ujymdyq ımmýnıtet qalyptaspaı, koronavırýstyń taralý oshaqtary paıda bolsa qashyqtan oqytýǵa qaıta kóshýge májbúr bolamyz.
COVID-19 statıstıkanyń artynda árbir adamnyń ómiri turǵanyn túsingen jón! Ekpe alyp, ózińizdi jáne jaqyndaryńyzdy qorǵańyz!» - dedi Nur-Sultan basshysy.