Elordada Pavlodar saýda úıin qurý qarastyrylýda
ASTANA. QazAqparat - Astanada Pavlodar oblysynda óndirilgen sapaly ónimderdi saýdalaıtyn Pavlodar saýda úıin jasaqtaý josparlanyp otyr. Bul týraly búgin osy oblystyń ákimi Qanat Bozymbaev málim etti.
«Bizdiń óńirden jetkizilgen ónimderdiń dámin astalyqtar tatyp kórýi kerek jáne oblysymyzdyń azyq-túlik ónimderi turǵyndarǵa unaıdy dep oılaımyz. Usynylǵan múmkindikter men búgin qol qoıylǵan kelisimniń arqasynda saýda oryndary men bazarlarǵa aýyl sharýashylyǵy taýarlaryn óndirýshiler aradaǵy deldalsyz tikeleı ónimderin jetkize alady. Osy oraıda biz bul jumystardy únemi baqylap otyramyz», - dedi oblys ákimi.
Sonymen qatar ol Astana ákimdigi saýda ornyn usynyp, ony oblys tarapy jalǵa alý máselesi qarastyrylyp jatqandyǵyn atap ótti.
«Biz bul nysandy Pavlodar saýda úıi etip jasamaqpyz. Osy oraıda óńirde óndiriletin barsha ónim Astananyń naryǵynda qoljetimdi bolady», - dedi Q. Bozymbaev.
Budan buryn habarlanǵandaı, búgin elordada Astana ákimdigi men Pavlodar oblysynyń ákimdigi arasynda saýda-ekonomıkalyq qatynasty júzege asyrý jónindegi memorandýmǵa qol qoıyldy. Bul qujatty Astana ákimi Ádilbek Jaqsybekov pen Pavlodar oblysynyń ákimi Qanat Bozymbaev bekitti.
