Elordada patrýldik baqylaý kúsheıtiledi
NUR-SULTAN. QazAqparat - Elordanyń saýda oıyn-saýyq ortalyqtarynda azyq-túlik dúkenderi, mashına jýatyn jerler men dárihanalar ǵana jumys isteıdi. Bul týraly Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Qalanyń saýda oıyn-saýyq ortalyqtarynda azyq-túlik dúkenderi, mashına jýatyn jerler men dárihanalar ǵana jumys isteıdi. Qalǵan saýda núkteleriniń bári ýaqytsha jumysyn toqtatady. Qaladaǵy 12 iri saýda-oıyn-saýyq ortalyqtary qazir ýaqytsha jumysyn toqtatý týraly sheshim qabyldady. Mysalǵa, Mega Silk Way-de jalǵa berip jatqan oryndaryn qazirshe jalǵa berý qunyn alýyn toqtatty jáne qyzmetkerleriniń jalaqysynyń 75 paıyzyn tóleýdi qoldap otyr. Biz ózge de iri ortalyqtardyń basshylarymen osy baǵytta jumys istep jatyrmyz», - deıdi Altaı Kólginov.
Sonymen birge, onyń aıtýynsha, halyqqa qyzmet kórsetý ortalyqtarynyń jumysy ýaqytsha shekteledi. Qazirgi ýaqytta shuǵyl másele bolmasa atalǵan ortalyqtarǵa barýdyń qajeti joq.
«Prezıdent tarapynan barlyq uıym basshylaryna qyzmetkerlerdiń 70 paıyzyn qashyqtyqtan jumys jasaýǵa nemese eńbek demalysyna shyǵarýǵa usynys jasaldy. Osyny saqtaýdy suraımyz. Bul kommýnaldyq qyzmetkerlerge, quqyq qorǵaý, arnaıy organdarǵa, medıtsına qyzmetkerlerine jáne qalanyń tynys-tirshiligin qamtamasyz etetin basqa uıymdarǵa qatysty emes», - dedi ol.
Qala basshysynyń aıtýynsha, saýda oıyn-saýyq ortalyqtarynda, bazarlar jáne kommýnaldyq sharýashylyq, tamaq ónerkásibi, qoǵamdyq tamaqtaný jerlerinde, halyqqa qyzmet kórsetý ortalyǵynda, vokzal men áýejaıda, qonaq úılerde jáne basqa da oryndarda sanıtarlyq zararsyzdanyrý rejimi kúsheıtildi.
«Medıtsınalyq tekserýden ótýge jáne emdelýden bas tartqan, karantın rejimin saqtaýǵa beı-jaı qarap, epıdemıologııalyq jaǵdaıdy jáne basqa da jaǵdaılardy anyqtaý úshin qolda bar málimetti jasyrǵan adamdarǵa baqylaý kúsheıtiledi. Olarǵa jaýapkershilik bar ekendigin umytpaýǵa shaqyramyz»,- dedi ol.
Qoǵamdyq tártipti saqtaý úshin qala aýmaǵynda patrýldik baqylaý kúsheıtiledi.
