Elordada páterdi jóndep jatqan jumysshy seıfti 7-qabattan laqtyryp jibergen

NUR-SULTAN. QazAqparat – Páterde jóndeý jumystaryn istep jatqan jumysshy seıfti buzyp asha almaǵan soń terezeden laqtyryp jibergen, dep habarlaıdy «QazAqparat» Nur-Sultan qalasynyń Polıtsııa departamentiniń baspasóz qyzetine silteme jasaı otyryp.

Krımınaldyq polıtsııa qyzmetkerleri 25 jastaǵy kúdiktini ustady.

«Tergeý barysynda anyqtalǵandaı, áıel adam páterde jóndeý jumystaryn júrgizý úshin jumysshyny shaqyrǵan. Jumys istep júrip jas jigit balkonda turǵan seıfke kózi túsedi. Túrli quralmen ony buzyp ashpaq bolady, biraq bul áreketinen túk shyqpaıdy. Іshinde iri kólemde aqsha bar dep oılap, kúdikti seıfti 7-qabattan terezeden laqtyryp jiberip, ózi tez arada páterden shyǵyp ketken. Seıf túsken jerge kelip, onyń ashylmaǵanyn kórip, kúdikti oqıǵa ornynan qashyp ketedi», - dep habarlady vedomstvodan.

Oqıǵanyń kýágerleri polıtsııa shaqyrǵan.

Anyqtalǵandaı, seıfte qujattar men 4 500 AQSh dollary bolǵan.

Qazir ury ustaldy. Qylmystyq is qozǵalyp, aıǵaqtar tárkilendi. Er adamnyń buǵan deıin elordada bolǵan osyndaı basqa oqıǵalarǵa qatysy bar ma tekserilip jatyr. Buǵan deıin onyń urlyq jasaǵany úshin sottalǵany anyqtaldy.