Elordada paralımpıadalyq bochchadan el chempıonaty bastaldy
ASTANA. KAZINFORM – Parlament Senatynyń Tóraǵasy, Qazaqstan bochcha federatsııasynyń Prezıdenti Máýlen Áshimbaev paralımpıadalyq bochchadan jyl saıynǵy respýblıka chempıonatynyń ashylý rásimine qatysty. Jaqsylyq Úshkempirov atyndaǵy Jekpe-jek saraıynda ótip jatqan jarysta jekeleı synnan bólek, alǵash ret komandalyq jáne juptyq saıystarda jeńimpazdar anyqtalady.
Chempıonatqa qatysýshylarǵa sáttilik tilegen Máýlen Áshimbaev bochchadan ulttyq qurama múshelerin taıaýda Fınlıandııada ótken bedeldi halyqaralyq jarysta jeńip alǵan júldelerimen quttyqtady. Federatsııa Prezıdenti bul úlken jeńisterdiń basy ekenin atap ótti. Ol úshin, eń bastysy, tabandylyq pen tózimdilik, erik-jiger men senim jáne jattyqtyrýshylar men sportshylardyń úılesimdi jumysy qajet.
«Jaqynda Fınlıandııada ótken jarysta ulttyq quramamyzdyń músheleri Qýanysh Asqarbekov, Itıana Shyńǵyshanova jáne Aleksandr Qurmantaev alǵash ret qola medal jeńip aldy. Bul jyl ótken saıyn sportshylarymyzdyń kásibı deńgeıi ósip kele jatqanyn kórsetedi. Sheberlikteri shyńdalyp, ózderine degen senimdilikteri jáne iri jeńisterge degen qulshynysy artyp keledi. Az ýaqyttyń ishinde bul sporttan jaryq juldyzdarymyzdyń shyqqanyna jáne ár jarys saıyn qatysýshylardyń qatary kóbeıip kele jatqanyna qýanyshtymyn. Biz barshańyzdy maqtan tutamyz. Memleket basshysy Qasym-Jomart Kemeluly Toqaev Qazaqstanda ınklıýzııany damytýǵa únemi basa mán berip keledi. Bizdiń jetistikterimiz – osyndaı qoldaýdyń jáne úlken komandanyń birlesken jumysynyń nátıjesi», – degen Máýlen Áshimbaev sportshylarǵa, olardyń ata-analary men jattyqtyrýshylarǵa alǵys bildirdi.
Aıta keteıik, Fınlıandııanyń Lahtı qalasynda ótken saıysta Qýanysh Asqarbekov jekeleı synda qola medal oljalady. Sondaı-aq komandalyq jarysta da Qýanysh Asqarbekov, Itıana Shyńǵyshanova jáne Aleksandr Qurmantaev úzdik úshtikten kórindi. Odan bólek, jekeleı synda Itıana Shyńǵyshanova – tórtinshi, Merýert Tilebaldy – besinshi, Baljan Bólekpaeva – altynshy jáne Temirlan Altynsary segizinshi oryn alǵanyn atap ótken jón.
«Sońǵy jyldarda elimizde bochcha qarqyndy damyp keledi. Az ýaqyttyń ishinde atalǵan paralımpıadalyq sportpen turaqty aınalysatyndar qatary shamamen 20 paıyzǵa artyp otyr. Bul erekshe qajettiligi bar myńdaǵan azamatqa sportpen shuǵyldanýǵa, jańa dostar tabýǵa jáne halyqaralyq arenalarda úlken jetistikterge jetýge jol ashady. Elimizde bochchanyń osylaı keńinen tanylyp, jańa qozǵalysqa aınalyp kele jatqanyna qýanyshtymyn. Bul rette sizder úlken úlgi kórsetip kelesizder», – dedi Federatsııa Prezıdenti.
Bıylǵy chempıonatqa qatysýshylar sanynyń kóp bolýy bul sport túrine degen qyzyǵýshylyqtyń arta túskenin dáleldeıdi. Byltyr el chempıonatyna 10 óńirden 50-ge jýyq sportshy kelse, bıyl 12 óńirden 89 sportshy qatysýǵa ótinim berdi. Qazirgi tańda 10 oblysta Qazaqstan bochcha federatsııasynyń fılıaldary jumys isteıdi. Al, 12 óńirde bochcha úıirmeleri bar.
Sonymen qatar, búgin Federatsııa konferentsııasynyń kezekten tys otyrysy ótti. Onda qatysýshylar ınklıýzıvti sport túrlerin odan ári damytýdyń ózekti máselelerin, onyń ishinde jattyǵý bazasyn damytý, qarjylandyrý, sportshylar arasynda básekelestikti arttyrý, tájirıbe jınaqtaý jáne taǵy basqa basymdyqtardy talqylady.
