Elordada pandemııada eńbek etken medıtsına mamandary men eriktiler marapattaldy
Syılyq ıdeıasynyń avtory, «Respýblıka-Aımaq-Damý» qoǵamdyq qorynyń prezıdenti Ǵalym Baıtoqtyń aıtýynsha, ádilqazy alqasy quramynda sportshy Baqtııar Artaev, QR Densaýlyq saqtaý vıtse-mınıstri Ajar Ǵınııat, Ekologııalyq uıymdar qaýymdastyǵynyń tóraǵasy Aıgúl Soloveva, qoǵam qaıratkeri Irak Elekeev bolǵan.
«Birden aıtaıyn, mereıtoılyq onynshy marapat keshin anaǵurlym keńirek atap ótý josparlanyp edi. Biraq, pandemııa jaǵdaıyna birqatar shekteýler boldy. Barlyq ýaqytta bizdiń negizgi qaǵıdalarymyz – adaldyq, ashyqtyq jáne ádildik bolyp qala beredi. Bıylǵy irikteý de ádettegideı qazylardyń óte qatal synynan ótti», - dedi Ǵalym Baıtoq «Rixos Astana» qonaqúıinde ótken marapattaý rásiminde.
Sonymen birge, Ǵalym Baıtoq keıbir atalymdarda birdeı daýys jınaǵan eki jeńimpazdyń da qatar marapattalǵanyn jetkizdi.
Eń aldymen marapat keshinde COVID-19 vırýsyna qarsy kúresken medıtsına mamandary men eriktilerge júlde tabystaldy. Osylaısha, «Jyldyń úzdik dárigeri» atalymynda Qyzylorda oblystyq ınfektsııalyq aýrýlar aýrýhanasynyń jansaqtaý bóliminiń meńgerýshisi Bolat Asanbaevqa berildi.
Odan bólek, qazylar alqasynyń sheshimimen koronavırýs pandemııasy kezinde eńbek etken birqatar medıtsına mamandaryna «Halyq súıiktisi» músinshesi men alǵys haty berildi. «Jyldyń úzdik medbıkesi» júldesi Mańǵystaý oblystyq aýrýhanasynyń aǵa medbıkesi Aınur Batyrbekovaǵa, «Sanıtarlyq-epıdemıologııalyq qyzmettiń úzdik qyzmetkeri» júldesi – Aqmola oblysy Býrabaı aýdandyq basqarmasynyń basshysy Seraly Joldasbaevqa tabystaldy.
«Úzdik medıtsınalyq statsıonar» júldesin Qaraǵandy oblysyndaǵy professor H. Maqajanov atyndaǵy kópbeıindi aýrýhana ujymy jeńip aldy. Marapatty aýrýhana dırektory Erkin-Dáýir Qurmanǵalıev aldy.
Pandemııa kezinde halyqqa kómek kórsetken erikti, «ıA Almatınets» tobynyń múshesi Saıda Táýekelovaǵa «Jyldyń úzdik eriktisi» júldesi berildi. Saıda Táýekelova pandemııa kezinde qaýip-qaterge qaramastan, halyqqa kómektesken árbir volonterge alǵys aıtty.
Sondaı-aq, pandemııa kezeńinde qoǵamdyq jumysqa úles qosqan Erjan Janatarov pen Rafael Gasanovqa «Halyq súıiktisi» músinsheleri berildi.
