Elordada ózgeniń páterin jalǵa berip júrgen alaıaq ustaldy
ASTANA. 24 qazan. QazAqparat - Elordalyq quqyq qorǵaýshylar ózgeniń páterin jalǵa berýmen aınalysyp júrgen alaıaqty qolǵa túsirdi, dep habarlady Astana qalalyq ІІD baspasóz qyzmetinen.
Jedel aldyn alý sharalaryn júrgizý barysynda Almaty aýdandyq ІІB qyzmetkerleri ózgeniń páterin jalǵan qujattar arqyly jalǵa bermek bolǵan, buryn sottalǵan 35 jastaǵy qyzylordalyqty ustady.
Qolǵa túsken azamattan jalǵan jeke kýálik, túbirtekter, sonymen qatar jalǵan qujattar daıyndaýǵa arnalǵan kompıýter, skaner tárkilendi. Polıtsııa qyzmetkerleriniń tekserýi barysynda alaıaqtyń osy sıpattaǵy 10 qylmysqa qatysy bar ekendigi anqytaldy. Ol páterdi 1 táýlikke jalǵa alyp, kelesi adamǵa jalǵa berip otyrǵan.
Qazirgi ýaqytta qolǵa túsken azamat Astana qalalyq ІІD ýaqytsha oqshaýlaý ornyna qamalyp, qylmystyq is qozǵaldy. Onyń osyǵan uqsas basqa da qylmystarǵa qatystylyǵy tekserilýde.
Іshki ister departamenti qala turǵyndar men qonaqtarynan osyndaı qylmystar týraly nemese ustalǵan azamat jaıynda aqparat biletin bolsa, 102, 71-67-10, 71-67-11 telefondaryna habarlasýyn ótinedi.
