Elordada ózge ult oqýshylary arasynda qazaq tilinen «Til - memleket táýelsizdiginiń sımvoly» atty 5 respýblıkalyq qashyqtyq olımpıadasynyń qorytyndy kezeńi ótýde

Ulttyq testileý ortalyǵy Memlekettik tildi damytý basqarmasynyń jetekshisi Aıdos Ábdihalyqovtyń atap ótýinshe, olımpıada Qaztest júıesi boıynsha ótpek. Qazaqstan azamattarynyń qazaq tilin bilý deńgeıin baǵalaýǵa arnalǵan baǵdarlama TOEFL, IELTS, DSH, TÖMER syndy halyqaralyq júıeler negizinde jasalǵan.

«Olımpıada barysynda daryndy balalardyń qazaq tilin meńgerýdegi 3 túrli, ıaǵnı tyńdap túsingenin, qazaq tiliniń leksıkalyq-grammatıkalyq qurylymyn jáne oqyp túsingenin baǵalaımyz. Jalpy til meńgerý deńgeıin baǵalaýda joǵaryda atalǵan halyqaralyq baǵdarlamalardyń tájirıbesine sáıkes aıtý, sóıleý jáne jaza bilý dárejesi de baǵalanýy kerek. Degenmen «Daryn» ortalyǵynyń sharttary boıynsha bul olımpıadada aıta bilý men jaza bilý qabiletterin baǵalaý joq», - dedi Qaztest ókili.

Onyń aıtýynsha, bilim saıysy barysynda oqýshylarǵa joǵaryda atalǵan 3 baǵyt boıynsha 150 tapsyrma usynylady. Test túrinde ótetin synaqqa 150 mınýt ýaqyt beriledi. Testte kezdesetin aýdıo mátinder Qazaq radıosynyń kásibı dıktorlaryn tartý arqyly jazylǵan. Estilý dárejesi óte joǵary.

Olımpıadany «Daryn» respýblıkalyq ǵylymı-praktıkalyq ortalyǵy men Ulttyq testileý ortalyǵy birlesip uıymdastyryp otyr. Saıystyń jabylý rásimi erteń ótedi.