Elordada ózge etnos ókilderi Naýryz merekesin toılady

Merekelik dýmanǵa Qazaqstan halqy Assambleıasynyń ókilderi, memlekettik organdar men Astana qalasy ákimdiginiń qyzmetkerleri, sondaı-aq Qyrǵyzstan, Ózbekstan, Túrkııa, Ázerbaıjan, Armenııa, Grýzııa, Reseı, Koreıa, Ýkraına, Bolgarııa sekildi 12 memlekettiń elshilik ókilderi qatysty.

«Naýryznama» onkúndigi aıasynda uıymdastyrylǵan sharanyń maqsaty – elimizdegi etnostar arasyndaǵy birlikti nyǵaıtý jáne ulttyq qundylyqtardy dáripteý.

Uıymdastyrý bóliminiń basshysy Sabına Amanbekovanyń aıtýynsha, bıylǵy merekelik baǵdarlamanyń aýqymy keń.

– Naýryznama bastalǵaly beri birneshe aýqymdy shara ótkizdik. Amal merekesinen bastap, ulttyq kıim kúnine arnalǵan defıle uıymdastyryldy. Búgingi sharaǵa 12 elden elshilik ókilderi kelip otyr. Dostyq úıiniń alańynda tórt kıiz úı tigildi. Birinde salt-dástúrler kórsetilse, ekinshisinde ulttyq aspaptar, úshinshisinde etnostardyń as máziri, al sońǵysynda qolóner sheberlik saǵattary ótip jatyr, – dedi Sabına Amanbekova.

Merekeniń rýhanı mańyzyna toqtalǵan tarıh ǵylymdarynyń doktory, professor Sadyq Tilegen Naýryzdyń jalpyulttyq sıpat alǵanyn atap ótti.

– Naýryz – dinine, diline qaramastan, barlyq ulttar úshin ortaq mereke. Qazaqstandy mekendegen halyqtar bul kúndi eldiń dástúrine qurmet retinde qabyldaıdy. Yntymaǵy jarasqan el ǵana bolashaqqa nyq qadam basa alady, – dedi professor.

Mereke aıasynda qazaqsha kúres, arqan tartý, gir kóterý, asyq atý jáne qol kúresinen jarystar uıymdastyryldy. Sporttyq básekelerdiń júlde qory da qomaqty: birinshi oryn ıegerlerine arnaıy dúkenge 200 myń teńgeniń, ekinshi orynǵa 150 myń, al úshinshi orynǵa 100 myń teńgeniń sertıfıkattary tabystaldy.

Asyq atý saıysyna qatysqan 8 jasar Salamat Aqıqat bul oıynnyń ereksheligin túsindirip berdi.

– Asyq atý qıyn emes, ony kez kelgen adam tez úırenip ketedi. Men bul ónerdi kýrstarda jetildirip júrmin, – deıdi jas sportshy.

Osyǵan deıin Astanada Naýryz merekesine oraı taqııa kesteleýden sheberlik saǵaty uıymdastyrylǵany týraly jazdyq.