Elordada óz páterinde kóz jumǵan keıýananyń týystaryn polıtseı taýyp bergen
NUR-SULTAN. QazAqparat – Elordada ýchaskelik ınspektor óz páterinde kóz jumǵan 80 jastaǵy áıeldiń týystaryn tabýǵa kómektesti, dep habarlaıdy QazAqparat tilshisi.
Qalalyq Polıtsııa departamenti taratqan aqparatqa sáıkes, elordalyq polıtsııa departamentiniń bastyǵyna «Pana» páter ıeleri kooperatıviniń tóraǵasy Gúlnar Ámirenovadan ýchaskelik polıtsııa ınspektory Asylan Áshirbaevtiń atyna joldanǵan alǵys hat kelgen.
PIK tóraǵasynyń aıtýynsha, ózi turatyn turǵyn úı keshenindegi páterlerdiń birinde 80 jastaǵy áje kóz jumǵan. Egde áıelge týǵan-týystary sırek keletindikten, keıýananyń naqty qashan qaıtys bolǵanyn anyqtaý da qıynǵa soqqan. Onyń ústine páterge kirýdiń ózi jaǵdaıdy ýshyqtyra túsken. Týǵan-týystarynyń qazadan habary bolmaǵan.
«Osyndaı kúrdeli jaǵdaıda polıtsııa kapıtany Asylan Áshirbaev qaıtys bolǵan kisiniń týǵan-týystaryn izdep tapty. Osydan keıin týǵan-týystary kelip, marqumdy jer qoınyna tapsyrý rásimine kiristi. Polıtsııa kapıtany bizben árdaıym baılanysta. Kez kelgen ótinimge birden jaýap qatyp otyrady», - deıdi polıtseıge alǵysyn joldaǵan PIK tóraǵasy.
