Elordada óz nárestesiniń basyn qaýip-qaterge tikken jas ana 1 jylǵa bas bostandyǵynan aıyryldy
ASTANA. 13 qyrkúıek. QazAqparat /Jasulan Amanbaıuly/ - Týǵan balasynyń basyn qaýip-qaterge tikken Astana qalasynyń 23 jastaǵy azamatshasy Saryarqa aýdandyq sottyń sheshimimen 1 jylǵa bas bostandyǵynan aıyryldy.
Bul týraly búgin Astana qalasy Prokýratýrasynyń baspasóz qyzmeti málim etti.
Qylmystyq istiń materıaldarynda kórsetilgenindeı, atalǵan azamatsha 2011 jyly qańtar aıynda salmaǵy 3 keli bolatyn, shekesi torsyqtaı qyz bosanǵan.
«Sol jyldyń 8 aqpanda nekesiz týǵan bala jóninde áke-sheshesimen sózge kelgen ol, nárestesin alyp, úıinen ketip qalady. «Óndiris» aýdanyndaǵy jekemenshik turǵyn úılerdiń biriniń janynan ótip bara jatyp, oǵan japsyra salynǵan sharýashylyq jaıdy kóredi. Jaqyn mańda eshkim bolmaǵandyǵyn paıdalanyp, 23 jastaǵy ana 2 aptalyq nárestesin sonyń ishine qaldyryp, ol aradan izin sýytady. Vokzalǵa jetip, odan Astanadaǵy týystarynyń úıine barady. Tastandy balany anyqtaǵan jekemenshik turǵyn úıdiń ıeleri dereý quqyqqorǵaý organdaryna habar beredi», - delingen baspasóz habarlamasynda.
Saryarqa aýdandyq sotynda aıypker óz kinásin tolyq moınyna alyp, jasaǵan áreketine ókinetindigin aıtty.
