Elordada oıyn-saýyq oryndaryna reıd júrgizildi

ASTANA. KAZINFORM – Astananyń Saryarqa aýdanyndaǵy oıyn-saýyq oryndaryna jergilikti-reıdtik is-shara ótkizildi. Bul týraly Astana ákimdiginiń resmı saıty jazdy. 

Mekemelerde aldyn alý jumystary júrgizilip, QR zańnamasynda belgilengen oryndarda temeki ónimderin paıdalaný salasyndaǵy QR zańnamasyn buzý faktileri anyqtaldy. Atap aıtqanda, qyzdyrylatyn temeki, kalıanǵa arnalǵan temeki, kalıan qospasy, temekini jylytýǵa arnalǵan júıeler, elektrondy júıeler men suıyqtyqtardy tutynýǵa tyıym salý. 

Saryarqa aýdany ákimi apparatynyń ishki saıasat jáne áleýmettik sala bólimi basshysynyń m. a. Damır Hısmatýllın bul is-shara temeki ónimderin kalıan túrinde satatyn buzýshylardy anyqtaýǵa kómektesetinin atap ótti. 

«Kalıan adam densaýlyǵyna jáne aınalasyndaǵylardyń densaýlyǵyna zııandy áser etetin keń taralǵan qurylǵy. Osyǵan baılanysty halyq arasynda salaýatty ómir salty tujyrymdamasyn iske asyrý maqsatynda atalǵan is-shara ótkiziledi. Kóbinese bul qurylǵylardy satyp alýshylar kámeletke tolmaǵan jastar bolyp sanalady, olar óz kezeginde denesine keltirilgen zııan týraly oılamaıdy.

Ótken jyly qoǵamdyq oryndarda kalıan qoldanýdyń 262 faktisi anyqtaldy, atalǵan buzýshylyqtar boıynsha mekeme ákimshileri men ıeleri atynan jaýapty tulǵalar ákimshilik jaýapkershilikke tartyldy. Sondaı-aq bıylǵy jyl basynan beri osyndaı 16 fakt anyqtaldy», - dep atap ótti Damır Hısmatýllın.

Ol reıdtik is-sharalar turaqty túrde ótkiziletinin aıtty.

Reıdter barysynda Respýblıka dańǵyly, 9/3 úı mekenjaıyndaǵy «Mıata», Áýezov kóshesi, 8 úı mekenjaıyndaǵy «Pınta» jáne Jeltoqsan kóshesi, 2 úı mekenjaıyndaǵy «Shıshka» sııaqty mekemeler qamtyldy.

Profılaktıkalyq is-sharany ótkizý kezinde 10 ýchaskelik polıtsııa ınspektory jumyldyryldy.