Elordada ótken dzıýdodan álem chempıonatyn 193 mln. adam teledıdar arqyly tamashalady
ASTANA. QazAqparat - Elimizdiń dzıýdo federatsııasy Halyqaralyq dzıýdo federatsııasynyń prezıdenti Marıýs Vızerden resmı hat aldy, dep habarlady «Dzıýdo federatsııasy» RQB baspasóz qyzmetinen.
Atalǵan hatta bıyl Astana qalasynda ótken álem birinshiligin teledıdar arqyly tamashalaǵan kórermender sany rekordtyq kórsetkishke jetkeni aıtylǵan. Máselen, ótken jyly Reseıdiń Chelıabi qalasynda ótkizilgen álem chempıonatyn tamashalaǵan kórermender sany 110 mıllıon bolyp tirkelse, elordadaǵy birinshilikti teledıdar arqyly 193 mıllıon adam tamashalaǵan. Sonymen qatar, Marıýs Vızer birinshilik bıyl qalyń kópshilik tarapynan asa qyzyǵýshylyq tanytqany úshin alǵys bildirdi. Sondaı-aq, hatta birinshilikke baılanysty 1000 saǵat tikeleı efır men jańalyqtar jasalyp, birinshilik týraly teledıdarlardan 3 mıllıard ár túrli materıaldar kórsetilip, taratylǵany aıtylǵan. Bul kórsetkish Chelıabi qalasynda ótken dodaly sport sharasyna qaraǵanda 147 paıyzǵa kóp.
