Elordada ótetin Óńirlik ekologııalyq sammıtinde Astana deklaratsııasy qabyldanady
TAShKENT. KAZINFORM — Sáýirde elordada ótetin Óńirlik ekologııalyq sammıtinde Ortalyq Azııa elderiniń basshylary Astana deklaratsııasyna qol qoıady. Muny Tashkentte ótip jatqan «Water week» forýmynda baıandama jasaǵan Sý resýrstary jáne ırrıgatsııa mınıstri Nurjan Nurjigitov aıtty, dep habarlaıdy Kazinform agenttiginiń Tashkenttegi menshikti tilshisi.
— Jaqyn arada óńirimiz úshin mańyzdy birqatar is-shara ótedi. 30 naýryzda Astana qalasynda Halyqaralyq Araldy qutqarý qory basqarmasynyń otyrysy bolady. Bul — qordyń qyzmeti men birlesken baǵdarlamalardy iske asyrý boıynsha negizgi sheshimder qabyldanatyn organ sanalady. Onda óńirlik ózara is-qımyldy odan ári damytýǵa baǵyttalǵan joǵary deńgeıdegi birqatar sheshim qabyldanady, — dedi mınıstr.
Sonymen qatar, 22 sáýirde elordada uıymdastyrylatyn Óńirlik ekologııalyq sammıt aıasynda Halyqaralyq Araldy qutqarý qorynyń quryltaıshy memleketteri basshylary keńesiniń otyrysy ótedi.
— Keńes qordyń joǵarǵy organy sanalady jáne onda keleshek óńirlik yntymaqtastyqtyń basym baǵyttary aıqyndalady. Otyrys qorytyndysy boıynsha memleket basshylarynyń tórt sheshimi, sondaı-aq Astana deklaratsııasy qabyldanbaq, — dep túıindedi Nurjan Nurjigitov.
Eske salaıyq, buǵan deıin Sý resýrstary jáne ırrıgatsııa mınıstri Qazaqstan sý sharýashylyǵy salasyndaǵy ulttyq saıasatty únemi jetildirip jatqanyn aıtyp edi.
Qosa ketsek, taıaýda Kazinform agenttigine suhbat bergen ózbekstandyq sarapshy Vadım Sokolov aımaqtaǵy sý tapshylyǵy bıyl da kúrdeli ekenin aıtqan edi.
